Jinoyat ishlari bo‘yicha Andijon shahar sudi 4-dekabr kuni bo‘lib o‘tgan sud majlisida Ukrainaga qarshi Rossiya tomonida jang qilgan O‘zbekiston fuqarosiga nisbatan hukm chiqardi.
Ayblovga ko‘ra, 39 yoshli T.A. mavsumiy ish topish maqsadida 2023-yilning aprelida Moskvaga borgan. U yerda u Rossiya Qurolli kuchlari safiga kirishga hamda Rossiya va Ukraina o‘rtasidagi harbiy harakatlarda qatnashishga qaror qilgan.
Sudlanuvchi 2023-yil 21-iyul kuni Rossiya armiyasi bilan shartnoma tuzgan. O‘sha yilning dekabrigacha u Rossiya tomonidan Ukrainaning Shaxtyorsk va Baxmut shaharlarida o‘tkazilgan jangovar harakatlarda qatnashgan. U 2023-yil 31-dekabr kuni O‘zbekistonga qaytib kelgan.
Sudda sobiq yollanma askar o‘z aybini to‘liq tan olgan va pushaymon ekanligini aytgan.
Sudlanuvchiga ko‘ra, u 2023-yil 17-aprelda Moskvaga borgan. Dastlab 15 kun davomida qassob bo‘lib ishlagan, keyin esa “Novatek” neft birjasiga ishga kirgan. U yerda Rossiya fuqarosi unga yuqori oylik maosh evaziga Ukrainaga qarshi harbiy harakatlarda ishtirok etish uchun Rossiya armiyasiga qo‘shilishni taklif qilgan.
Sudlanuvchining aniqlik kiritishicha, yangi tanishi yarador bo‘lgan taqdirda yollanuvchiga tovon puli to‘lanishini va’da qilgan. O‘zbekistonlik taklifga qiziqish bildirib, 2023-yil iyun oyida shartnoma tuzgan, Moskvadagi poligonda ikki oylik harbiy tayyorgarlikdan o‘tgan.
U, shuningdek, Rossiya kuchlari bilan qo‘shimcha shartnomalar tuzgan, hujjatlarga ko‘ra, jangovar harakatlarda qatnashish uchun yollanma harbiyga oyiga 450 ming rubl (o‘sha davr uchun taxminan 4950 dollar/57,5 million so‘m) va’da qilingan. Avvaliga u 150 ming rubldan ikki marta to‘lov olgan, ammo keyin to‘lovlar to‘xtatilgan.
2023-yil iyul oyi oxirida u Ukrainaning Shaxtyorsk va Baxmut shaharlariga yuborilgan va u yerda tojikistonliklar va boshqa xorijliklar bilan tanishgan. 2023-yil noyabrigacha bo‘lgan harbiy harakatlar davomida ayblanuvchi, o‘z e’tirofiga ko‘ra, 10 dan ortiq ukrainalik harbiy xizmatchilarni o‘ldirgan.
Jang maydonida ko‘rsatgan faolligi uchun u Rossiya qo‘shinlarining razvedka bo‘linmasiga o‘tkazilgan. Keyin besh oy davomida Luganskdagi jangovar harakatlarda qatnashgan.
2023-yil dekabr oyida u Moskvaga qaytgan. U Rossiyada xizmatda qolish taklifini rad etib, opasi va rafiqasi bilan birga O‘zbekistonga kelishga qaror qilgan. Uning so‘zlariga ko‘ra, oila a’zolari uning nima bilan shug‘ullanganidan qisman xabardor bo‘lgan.
2023-yil 31-dekabr kuni fuqaro Qozog‘iston orqali chegarani kesib o‘tib, O‘zbekistonga qaytib kelgan. Shundan so‘ng u o‘z ixtiyori bilan huquqni muhofaza qilish organlariga kelib, Rossiya Qurolli kuchlarida xizmatini tasdiqlovchi barcha hujjatlarni taqdim etgan.
Sudlanuvchi sud majlisida o‘z xatti-harakatlarini og‘ir moddiy ahvol va oilaning yagona boquvchisi ekani bilan izohlab, pushaymonligini bildirgan.
Sudya Otabek Mamajonov uni Jinoyat kodeksining 154-moddasi 1-qismi (yollanish/5 yildan 10 yilgacha ozodlikdan mahrum qilish bilan jazolanadi) va 154-1-moddasi 1-qismi (xorijiy davlatlar harbiy xizmatiga kirish, yollash/BHMning 300 baravarigacha miqdorda jarima yoki 3 yilgacha axloq tuzatish ishlari bilan jazolanadi) bilan aybdor deb topdi.
Izoh (0)