Афғонистон Ислом Амирлиги Олий таълим вазирлиги афғонистонлик қизларга эркак васий ҳамроҳлик қилган тақдирда Покистонда олий таълим олишга рухсат берилиши мумкинлиги ҳақидаги матбуотда пайдо бўлган хабарларни рад этди. Бу ҳақда Khaama Press ахборот портали маълум қилди.
Вазирлик матбуот котиби Ҳафиз Зияуллоҳ Ҳошимий ОАВ вакилларига “Покистон билан афғон қизларига стипендиялар бериш бўйича шартли келишув ҳақидаги хабарлар ёлғон ва асоссиз” эканини айтди.
Нашр маълумотларига кўра, у “вазирлик афғонистонлик қизлар учун стипендиялар бўйича ҳеч бир давлат, шу жумладан, Покистон билан ҳам ҳеч қандай келишувга эришмаганини” қайд этган.
Яқинда баъзи оммавий ахборот воситалари вазирлик Покистон билан афғонистонлик талаба қизларга эркак васий ҳамроҳлигида ўқишни давом эттиришлари учун келишувга эришгани ҳақида хабар берди. Бироқ вазирлик бундай келишув мавжуд эмаслигини тасдиқлади, дея таъкидлайди Khaama Press.
“Толибон” ҳокимият тепасига келгач, хотин-қизларга нисбатан кўплаб чекловлар жорий этилди. Тақиқлар туфайли аёллар ва қизлар таълим олиш, ишлаш, спорт, саёҳат қилиш ва дам олиш ҳуқуқидан маҳрум қилинди.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёл дикторларга телевизордаги янгиликларни ўқишни ва аёл журналистларга матбуот анжуманларига бориш,
- аёлларга бир-бири билан гаплашиш тақиқланган.
Изоҳ (0)