Transport vazirligi O‘zbekiston va Afg‘oniston Hayraton—Mozori Sharif temiryo‘lidan foydalanish bo‘yicha shartnomani uzaytirganini ma’lum qildi.
Qayd etilishicha, O‘zbekiston prezidentining doimiy ravishda qo‘shni mamlakatlar bilan yaxshi qo‘shnichilik munosabatlarini mustahkamlash yo‘lida olib borayotgan oqilona siyosatining samarasi o‘laroq, 2025-yil 21—23-yanvar kunlari Toshkent shahrida Afg‘oniston jamoat ishlar vazirining temiryo‘l masalalari bo‘yicha o‘rinbosari Muhammad Sohibzoda boshchiligidagi delegatsiya bilan samarali uchrashuvlar tashkil etildi.
Ilhom Mahkamov boshchiligida o‘tkazilgan uchrashuvda afg‘on tomoni bilan transafg‘on temiryo‘l qurilish loyihasini amalga oshirishni jadallashtirish yuzasidan fikr almashildi va tomonlar kelgusi ishlarni tashkil etish bo‘yicha kelishib oldi.
Shu bilan birga, ikki davlat temiryo‘l ma’muriyatlari o‘rtasida faol hamkorlikni yanada mustahkamlash maqsadida Hayraton—Mozori Sharif temiryo‘lidan foydalanish va unga xizmat ko‘rsatish bo‘yicha shartnomani uzaytirish yuzasidan kelishuvga erishildi.
Bunda “O‘zbekiston temir yo‘llari” AJning “Sogdiana trans” MCHJ Hayraton—Mozori Sharif temiryo‘liga xizmat ko‘rsatuvchi operator sifatida saqlanib qoladi.
Hayraton—Mozori Sharif temiryo‘lidan foydalanish
Afg‘onistonning Mozori Sharif shahrini O‘zbekiston chegarasi bilan bog‘lovchi 75 kilometrlik temiryo‘l 2010-yili ochilgan. Temiryo‘lni qurish bo‘yicha Afg‘oniston hukumati tenderida “O‘zbekiston temir yo‘llari” yutib chiqqan. Loyiha Osiyo taraqqiyot bankining 165 million dollar hajmidagi granti hisobidan amalga oshirilgan.
Uni boshqarish va texnik xizmat ko‘rsatish ishlarini 2011-yilning dekabridan beri “O‘zbekiston temir yo‘llari” aksiyadorlik jamiyati sho‘ba korxonasi “Sogdiana trans” amalga oshirib kelayotgan edi.
2023-yil fevralida 12-fevral kuni Afg‘oniston temiryo‘l boshqarmasi va “Sogdiana trans” ShK o‘rtasida Hayraton–Mozori Sharif temiryo‘lida ekspluatatsiya ishlarini davom ettirish to‘g‘risida yangi kelishuv imzolangandi. Unga ko‘ra, “Sogdiana trans” 2 yil davomida o‘z faoliyatini davom ettirishi belgilangandi.
Izoh (0)