Kino sanoatida e’tirofga erishish uchun aktyorlar ko‘p va qattiq mehnat qilishlari kerak. Ba’zan bu ham kamlik qiladi. Bunday paytda omad yordamga kelmasa, hammasi bekor — Deniyel Redkliff, Juliya Roberts, Eddi Myorfi va boshqalar shular jumlasidandir.
Juliya Roberts va “Sohibjamol” (1990)
“Sohibjamol” filmi yengiltabiat Viven ismli qiz va moliyaviy magnat Edvard Lyuis o‘rtasidagi kutilmagan munosabatlar haqida hikoya qiladi. Juliya Roberts va Richard Gir bosh rollarni ijro etgan bu romantik komediyaga 30 yildan oshgan bo‘lsa-da, bu rollar har ikkala aktyor uchun ham eng xotirada qolarli va yorqin ijro namunalaridan biri bo‘lib qolmoqda.
Leonardo Di Kaprio va “Titanik” (1997)
Leonardo DiKaprio superyulduz unvoniga Jek Douson roli orqali erishdi. Qizig‘i shundaki, aktyor “Titanik” filmida ishtirok etishni istamagan, buning sababini syujet zerikarli deb tushuntirgan. Shunda Jeyms Kemeron o‘jar aktyorga film ekranlarga chiqqanidan so‘ng uni qanday kelajak kutayotganini tushuntirishga majbur bo‘ladi. Keyinchalik DiKaprio faqatgina kelishgan yigitlarni emas, balki boshqa rollarni ham mahorat bilan ijro eta olishini isbotladi. Uning ijro etgan obrazlari orasida “Ozod Jango” vesternidagi shafqatsiz quldor Kelvin Kendi, “Uoll-strit bo‘risi” jinoiy dramasidagi ashaddiy firibgar Jordan kabi rollar bor. Shuningdek, “Omon qolgan” filmida tabiatga qarshi kurashuvchi ovchi rolini ham ijro etdi. Aynan shu rol uchun DiKaprio uzoq kutilgan “Oskar” mukofotiga sazovor bo‘ldi.
Tobi Maguayr va “O‘rgimchak odam” (2002)
Superqahramon haqidagi mashhur film ekranlarga chiqmasidan oldin Tobi Maguayr boshqa filmlarda ham suratga tushgan edi. U “Plezantvill” fantastik filmidagi omadsiz Devid rolini ijro etgani uchun eng yaxshi yosh aktyor sifatida “Saturn” mukofotiga sazovor bo‘ldi. Biroq tomoshabinlar uni asosan “O‘rgimchak odam” komikslari asosida suratga olingan filmda Piter Parker roli orqali eslab qolishgan.
Eddi Myorfi va “48 soat” (1982)
“48 soat” nomli kriminal komediyadagi jinoyatchi Reji Xemmond roli Eddi Myorfiga “Oltin globus” nominatsiyasini olib keldi. Filmdagi ishi aktyor uchun kinodagi debyuti bo‘ldi, shundan so‘ng u iste’dodli komediyachi sifatida shuhrat qozondi. Shundan so‘ng Myorfi Aksel Fouli rolini o‘ynagan “Beverli-Xillz politsiyasi” uning yulduz maqomini yanada mustahkamladi.
Deniyel Redkliff va “Garri Potter va hikmatlar toshi” (2001)
Xogvartsning yosh sehrgari roli Redkliffni chinakamiga mashhur qildi. Uning qahramoni — zinapoya ostidagi qaznoqda yashovchi yetim bolaga axiri taqdir ham kulib boqadi. Shunisi e’tiborga loyiqki, Deniyel franshiza chiqqunga qadar ham kinoda rol o‘ynagan. Masalan, u Pirs Brosnan bilan “Panamadagi bandargoh” dramatik trillerida bosh rolni ijro etgan. Uning karyerasi esa “Devid Kopperfild” telefilmidan boshlangan. Shunga qaramay, aktyorni aynan sehrgar bola roli dunyoga mashhur qildi.
Uma Turman va “Jinoiy asar” (1994)
Uma Turman “Jinoiy asar” filmi rejissyori Kventin Tarantinoni ham o‘ziga rom qilgan go‘zal qiz Mia roli uchun “Oskar” nominatsiyasiga sazovor bo‘ldi. Tarantinoning o‘zi ham bir necha bor Uma Turman uning ilhom manbayi ekanligini tan olgan edi. Aktrisa rejissyorning “Billni o‘ldirish” jinoiy jangari filmining ikkala qismida ham suratga tushgan.
Izoh (0)