So‘nggi yillarda hindistonlik aktyorlar, rejissyorlar va kino sohasidagi boshqa yulduzlar Gollivud e’tiborini ko‘proq jalb qilmoqda. Ular filmlarda rol o‘ynash bilan cheklanmay, xalqaro kino sanoatining muhim qismiga aylanib, madaniyatlar almashinuvini targ‘ib qilmoqda va uzoq yillar davomida qolib ketgan stereotiplarni buzmoqda. Quyida Gollivudda ham katta mavqega ega bo‘lgan eng mashhur hindistonliklar haqida so‘z boradi.
Priyanka Chopra
Gollivudda ham ulkan muvaffaqiyat qozongan eng mashhur hind aktrisalaridan biri bu Priyanka Chopradir. U 18 yoshida “Dunyo go‘zali-2000” tanlovida g‘olib bo‘lgach, karyerasiga birinchi qadamni qo‘ydi. G‘alabasidan uch yil o‘tib, Priyanka Bollivudda ish boshladi va bugungi kunda u Hindistondagi eng ko‘p maosh oluvchi aktrisalardan biri hisoblanadi. Chopra “Malibu qutqaruvchilari”, “Matritsa: Qayta tug‘ilish” va “Qo‘rg‘on” kabi Gollivud filmlarida suratga tushgan.
Uning Gollivudda eng katta shuhrat olib kelgan roli bu “Kuantiko” (2015–2018) seriali bo‘lib, aktrisa unda Federal tergov byurosining agenti — Aleks Perrish rolini ijro etgan. So‘ng Chopra o‘zining xarizmasi va iste’dodi tufayli amerikalik tomoshabinlarning sevimli hind aktrisasiga aylandi.
Chopra aktrisalikdan tashqari prodyuserlik bilan ham shug‘ullanadi va UNICEFning ezgu niyat elchisi hisoblanadi.
Dev Patel
Garchi Patel “Xarobadan chiqqan millioner” filmi chiqishidan oldin Britaniyaning “Go‘daklar” o‘smirlar serialida kichik rol o‘ynagan bo‘lsa-da, uning katta ekrandagi debyuti olamshumul mashhurlik keltirdi. Film sakkizta nominatsiya bo‘yicha Oskar mukofotini qo‘lga kiritdi. Loyiha muvaffaqiyatidan so‘ng Dev Patel Gollivudda ishini davom ettirdi.
Keyinchalik yosh aktyor ko‘plab mashhur loyihalarga taklif qilindi, ularning orasida “Avatar: Aang afsonasi” multfilmi asosida suratga olingan “To‘rt unsur hukmdori” kartinasi ham bor.
Patelning navbatdagi ajoyib roli Sara Brayerlining “Arslon” filmidagi Nikol Kidman va Runi Mara bilan birgalikdagi ishi bo‘ldi. Film olti nominatsiya bo‘yicha Oskar mukofotiga loyiq ko‘rildi. 2021-yilda esa u “Yashil ritsarning afsonasi” filmida rol o‘ynadi va uning aktyorlik doirasi ancha keng ekanligini isbotladi.
Ayshvariya Ray Bachchan
Ayshvariya Ray ham Priyanka Chopra singari o‘z faoliyatini go‘zallik tanlovida g‘oliblikdan boshladi va 1994-yilda “Dunyo go‘zali” bo‘ldi. So‘ng qisqa fursat ichida unga yirik reklama shartnomalari bo‘yicha takliflar tushdi. U hatto Vogue jurnali muqovasida paydo bo‘ldi.
Ayshvariya o‘zining Gollivuddagi debyutini Jeyn Ostenning klassik romani asosida suratga olingan “Kelin va xurofot” (2004) filmidan boshladi. Shuningdek, u Gollivud filmlaridan “Pushti pantera-2”, “Ziravorlar malikasi” va yana bir nechta filmlarda suratga tushgan. Aktrisaga Bred Pitt bilan “Troya” filmida rol ijro etish taklifi berilgan, ammo u taklifni rad etgan.
Hozirda Ayshvariya Ray bir qator xalqaro brendlarning, jumladan L’Oréal brendining yuzi hisoblanadi va muntazam ravishda Kann kinofestivalida ishtirok etadi.
Irfon Xon
2020-yilda 53 yoshida vafot etgan Irfon Xon Gollivudda muvaffaqiyat qozongan eng hurmatli hind aktyorlaridan biri edi. Uning iste’dodi va ko‘p qirrali inson ekanligi nafaqat Hindistonda, balki xorijda ham qadrli insonga aylantirgan edi.
U “Pi hayoti” (2012), “Yura davri dunyosi” (2015) va “Do‘zax” (2016) kabi filmlardagi rollari bilan yodda qoldi. 2008-yilda suratga olingan “Xarobadan chiqqan millioner” filmida Irfon Xon politsiyachi rolini o‘ynagan, bu rol unga xalqaro miqyosda mashhurlik keltirgan. Shuningdek, aktyor 2016-yilda suratga olingan “Da Vinchi kodi: Inferno davomi” filmida Garri Sims konsorsiumi rahbari obrazini yaratgan.
Frida Pinto
Freida Pinto aktyor Dev Patel singari “Xarobadan chiqqan millioner” tufayli butun dunyo bo‘ylab shuhrat qozondi. Shundan so‘ng uning Gollivuddagi karyerasi boshlandi. Aktrisa Bollivuddan ko‘ra Britaniya va Amerika loyihalarida ishtirok etishni afzal ko‘radi. U “Maymunlar sayyorasi” (2011) va “Kubok ritsarlari” (2015) kabi filmlarda suratga tushgan.
Pinto xayriya ishlarida ham faol. U kambag‘al mamlakatlarda yashaydigan ayollar va bolalarni qo‘llab-quvvatlashga qaratilgan loyihalarda ishtirok etadi.
Nayt Shyamalan
Hindistonda tug‘ilib o‘sgan M. Nayt Shyamalan xalqaro miqyosda mashhur rejissyor va ssenariy muallifiga aylandi. Uning filmlarida ko‘pincha kutilmagan syujetli burilishlar va jiddiy mavzular ko‘tariladi. Shyamalanning “Oltinchi hissiyot” (1999) filmi haqiqiy klassikaga aylandi va oltita karra “Oskar” mukofotiga nomzod bo‘ldi.
Shyamalanning boshqa muvaffaqiyatli loyihalari orasida “Metin odam” (2000), “Belgilar” (2002), “Qishloq” (2004) va “Split” (2016) bor.
Mira Nair
Mira Nair Gollivuddagi eng mashhur hind rejissyorlaridan biri. Uning “Yomg‘irli mavsumdagi to‘y” (2001) filmi tanqidchilarning ko‘plab olqishiga va turli mukofotlarga sazovor bo‘ldi. Keyinchalik u “Nyu York, seni sevaman” (2008) va “Katve malikasi” (2016) kabi loyihalar ustida ishladi.
Uning filmlari milliy an’analar va muhojirlar duch kelgan qiyinchiliklarni yorqin aks ettirishi bilan ajralib turadi. Shuningdek, Nair rivojlanayotgan mamlakatlardagi yosh kino ijodkorlarini qo‘llab-quvvatlovchi tashkilotga asos solgan.
Izoh (0)