Кино саноатида эътирофга эришиш учун актёрлар кўп ва қаттиқ меҳнат қилишлари керак. Баъзан бу ҳам камлик қилади. Бундай пайтда омад ёрдамга келмаса, ҳаммаси бекор — Дениел Редклифф, Жулия Робертс, Эдди Mёрфи ва бошқалар шулар жумласидандир.
Жулия Робертс ва “Соҳибжамол” (1990)
“Соҳибжамол” фильми енгилтабиат Вивен исмли қиз ва молиявий магнат Эдвард Льюис ўртасидаги кутилмаган муносабатлар ҳақида ҳикоя қилади. Жулия Робертс ва Ричард Гир бош ролларни ижро этган бу романтик комедияга 30 йилдан ошган бўлса-да, бу роллар ҳар иккала актёр учун ҳам энг хотирада қоларли ва ёрқин ижро намуналаридан бири бўлиб қолмоқда.
Леонардо Ди Каприо ва “Титаник” (1997)
Леонардо ДиКаприо суперюлдуз унвонига Жек Доусон роли орқали эришди. Қизиғи шундаки, актёр “Титаник” фильмида иштирок этишни истамаган, бунинг сабабини сюжет зерикарли деб тушунтирган. Шунда Жеймс Кемерон ўжар актёрга фильм экранларга чиққанидан сўнг уни қандай келажак кутаётганини тушунтиришга мажбур бўлади. Кейинчалик ДиКаприо фақатгина келишган йигитларни эмас, балки бошқа ролларни ҳам маҳорат билан ижро эта олишини исботлади. Унинг ижро этган образлари орасида “Озод Жанго” вестернидаги шафқатсиз қулдор Келвин Кенди, “Уолл-стрит бўриси” жиноий драмасидаги ашаддий фирибгар Жордан каби роллар бор. Шунингдек, “Омон қолган” фильмида табиатга қарши курашувчи овчи ролини ҳам ижро этди. Айнан шу рол учун ДиКаприо узоқ кутилган “Оскар” мукофотига сазовор бўлди.
Тоби Магуайр ва “Ўргимчак одам” (2002)
Суперқаҳрамон ҳақидаги машҳур фильм экранларга чиқмасидан олдин Тоби Магуайр бошқа фильмларда ҳам суратга тушган эди. У “Плезантвилл” фантастик фильмидаги омадсиз Девид ролини ижро этгани учун энг яхши ёш актёр сифатида “Сатурн” мукофотига сазовор бўлди. Бироқ томошабинлар уни асосан “Ўргимчак одам” комикслари асосида суратга олинган фильмда Питер Паркер роли орқали эслаб қолишган.
Эдди Mёрфи ва “48 соат” (1982)
“48 соат” номли криминал комедиядаги жиноятчи Режи Хеммонд роли Эдди Mёрфига “Олтин глобус” номинациясини олиб келди. Фильмдаги иши актёр учун кинодаги дебюти бўлди, шундан сўнг у истеъдодли комедиячи сифатида шуҳрат қозонди. Шундан сўнг Mёрфи Аксел Фоули ролини ўйнаган “Беверли-Хиллз полицияси” унинг юлдуз мақомини янада мустаҳкамлади.
Дениел Редклифф ва “Гарри Поттер ва ҳикматлар тоши” (2001)
Хогварцнинг ёш сеҳргари роли Редклиффни чинакамига машҳур қилди. Унинг қаҳрамони — зинапоя остидаги қазноқда яшовчи етим болага ахири тақдир ҳам кулиб боқади. Шуниси эътиборга лойиқки, Дениел франшиза чиққунга қадар ҳам кинода рол ўйнаган. Масалан, у Пирс Броснан билан “Панамадаги бандаргоҳ” драматик триллерида бош ролни ижро этган. Унинг карьераси эса “Девид Копперфилд” телефильмидан бошланган. Шунга қарамай, актёрни айнан сеҳргар бола роли дунёга машҳур қилди.
Ума Турман ва “Жиноий асар” (1994)
Ума Турман “Жиноий асар” фильми режиссёри Квентин Тарантинони ҳам ўзига ром қилган гўзал қиз Миа роли учун “Оскар” номинациясига сазовор бўлди. Тарантинонинг ўзи ҳам бир неча бор Ума Турман унинг илҳом манбайи эканлигини тан олган эди. Актриса режиссёрнинг “Биллни ўлдириш” жиноий жангари фильмининг иккала қисмида ҳам суратга тушган.
Изоҳ (0)