АҚШнинг Миннесота штати сенатори Омар Фотиҳ ўз номзодини Миннеаполис мери лавозимига қўйгандан сўнг, интернетда ўзининг баъзи сиёсий қарашлари сабаб ирқчилик ҳужумларига дуч келмоқда. Бу ҳақда TheTimes of India хабар берди.
34 ёшли Омар Фотиҳ сайлов кампаниясига киришган. Унинг сайловолди дастурига кўра, 2028 йилга келиб Миннеаполис шаҳрида энг кам соатбай иш ҳақи 20 долларга етказилади. Номзод, бундан ташқари, ижара ҳақини музлатиш ва полициянинг федерал иммиграция органлари билан ҳамкорлигини блоклаш каби таклифларни ҳам илгари сурган.
Фотиҳнинг сиёсий фикрлари ва ирқий келиб чиқиши интернетда унга нисбатан норозилик кайфиятини юзага келтирган. Консерватив қатлам уни “террорчи” деб атамоқда. Шунингдек, уни машҳур ню ёрклик сиёсатчи Зоҳран Мамданига ўхшатганлар ҳам бор. Баъзилар уни “Мамданининг кичикроқ версияси” дея таъкидламоқда.
Танқидчилар ундан Сомалига қайтиб кетишини талаб қилган. Баъзилар унинг ташқи кўриниши устидан ҳам кулмоқда.
“Бошининг шаклидан унинг сомалилик экани билиниб турибди. У Могадишо (Сомали пойтахти) мери лавозимига номзодини қўйиши керак”, деб ёзган консерватив сиёсий стратег Жоэй Маннарино.
Бошқалар Фотиҳ Вашингтонда туғилгани ва 2021 йилдан бери Миннесота қонун чиқарувчи органида ишлаб келаётганига қарамай, унинг фуқаролиги сохталигини даъво қилган. Ҳаттоки, интернетда Сомали ҳақида камситувчи гаплар ҳам тарқалган. Фотиҳ бу дискриминацияларга эътибор бермай, бўлажак сайловларга ўз эътиборини қаратган.
Нью Йорк мерлигига сайлов
Омар Фотиҳ кўп жиҳатдан Зоҳран Мамдани феноменини эслатиб юборади. У муҳожир оиласида туғилган бўлиб, ислом динига эътиқод қилади. Нью Йорк мерлиги учун Демократик партия праймеризида ғолиб чиққан номзод ўзининг социалистик қарашларини яшириб ўтирмайди. Шу боис АҚШ президенти Дональд Трамп Мамданини бир неча бор коммунист деб атаган.
Бюджети 115 миллиард долларни ташкил қиладиган, аҳолиси салкам 10 миллионга етадиган шаҳарни ким бошқариши шу йил кузида маълум бўлади. Бироқ ню ёркликларнинг аксарияти демократ номзодларни қўллаб келгани боис, шарҳловчилар Мамданининг ғалабасига шубҳа қилмайди.
Изоҳ (0)