Украина президенти Владимир Зеленский мамлакатда кўп фуқаролик институтини жорий этиш тўғрисидаги қонунни имзолади. Бу ҳақда у ўзининг Telegram каналида хабар берди.
Зеленский қонунни амалга ошириш учун барча қонуности ҳужжатларини зудлик билан ишлаб чиқиш ва қабул қилишни топширганини таъкидлаган. Шунингдек, кўп фуқароликка рухсат бериладиган давлатлар рўйхатини ишлаб чиқиш бошланишини маълум қилган.
Эндиликда муайян шартларга кўра, украиналиклар бир вақтнинг ўзида икки ёки ундан ортиқ давлат паспортига эга бўлиши мумкин бўлади.
Ҳужжатга кўра, Украина фуқаролари учун Украина фуқаролигини йўқотиш хавфисиз чет эл фуқаролигига эга бўлиш масаласи ҳал этилади (бошқа давлат ҳукумат томонидан белгиланган давлатлар рўйхатига киритилган тақдирда).
Бундан ташқари, Украина фуқаролигидан воз кечмаган ҳолда бошқа давлат фуқаролигини расман олиш ҳуқуқи берилади (агар бошқа давлат ҳукумат томонидан белгиланган давлатлар рўйхатига киритилган бўлса).
Бошқа давлатлар фуқароларига эса келиб чиқиши украиналик бўлган шахслар учун қисқартирилган тартибда Украина фуқаролигини олиш ҳуқуқи берилади.
Янги қонун Украинада ҳарбий хизматни ўтаётган хорижликлар учун фуқаролик олишнинг соддалаштирилган тартибини, шунингдек, ўз мамлакатларида сиёсий сабабларга кўра таъқиб қилинаётган шахсларга Украина фуқаролигини олиш ҳуқуқини назарда тутади.
Украинада кўп фуқаролик институти нима учун жорий этилди?
Ҳукуматнинг таъкидлашича, ҳужжат демографик ва хавфсизлик муаммоларига, шунингдек, давлат ташқарисидаги миллионлаб украиналиклар билан алоқани тиклаш ва сақлаб қолиш заруратига жавоб сифатида ишлаб чиқилган.
Украина Олий Радасининг гуманитар ва ахборот сиёсати бўйича раис ўринбосари ва халқ депутати Евгения Кравчукнинг айтишича, кўп фуқаролик тўғрисидаги қонун амалда иккита паспортга эга бўлган украиналикларни қонунбузар қилмайди.
“Жуда кўп украиналиклар 10-20 йил олдин мамлакатдан чиқиб кетиб, бошқа давлатлар фуқаролигини олишган. Қабул қилинган ҳужжат бундай шахсларга Украина паспортини сақлаб қолиш, уни қайта расмийлаштириш ва Украина фуқароси бўлиб қолиш имконини беради”, дейди Кравчук.
Унинг сўзларига кўра, ҳужжат уруш туфайли бошпана излаётган Украинадан мажбурий кўчиб кетганларга Украина билан алоқани сақлаб қолишга ёрдам беради.
Бундан ташқари, чет элда туғилган кичкина украиналикларнинг ота-оналари энди фуқароликни танлашга мажбур бўлмайди. Уларда Украина паспортига ҳам, оилани қабул қилган мамлакат паспортига ҳам эга бўлиш имконияти пайдо бўлади.
Шунингдек, ҳеч қачон Украина фуқаролигига эга бўлмаган этник украиналиклар учун тартиб соддалаштирилади. Улар фуқароликни олишдан олдин Украинада камида бир йил яшаши шарт бўлади.
Изоҳ (0)