Ҳиндистонда дунёнинг энг кекса марафончиси Фаужа Сингҳ 114 ёшида йўл-транспорт ҳодисаси оқибатида вафот этди. Бу ҳақда Hindustan Times газетаси хабар бермоқда.
Маълумотларга кўра, Беас қишлоғида йўлни кесиб ўтаётган пайтда Сингҳни автомобиль уриб юборган. У Жаландҳардаги хусусий шифохонада вафот этган.
Фаужа Сингҳ 1911 йил 1 апрелда туғилган ва болалигиданоқ югуришга қизиқиб қолган. 1990 йилларда у Буюк Британияга кўчиб ўтган ва 89 ёшида машғулотларни қайта бошлаган. Сингҳ фахрийлар учун халқаро марафонларда фаол иштирок этган.
2003 йилда у Торонтодаги марафонда 5 соат 40 дақиқада югуриб, ўз ёш тоифасида жаҳон рекордини ўрнатган. 2011 йилда у 100 ёшида марафон масофасини босиб ўтган дунёдаги энг кекса марафончи сифатида Гиннеснинг рекордлар китобига киритилган.
Январь ойида Венгрияда Олимпия ўйинлари тарихидаги энг кекса совриндор аёл Агнеш Келети 104 ёшида вафот этганди.
Изоҳ (0)