San Francisco Chronicle нашри 35 миллионлик мега-ҳовлилар жойлашган Пресидио Террас кўчасининг Тина Лэм ва Майкл Чэн томонидан сотиб олиниши билан боғлиқ воқеа ҳақида ҳикоя қилди, деб ёзади InsiderPro.
Сан-Франциско муниципалитети солиқлардан қарзлари туфайли кўчани сотувга қўйди, бироқ бу ҳақда бадавлат уй соҳибларини хабардор этмади. Кремний водийси муҳандиси Лэм ва кўчмас мулклар бўйича агент Чэн кўча, йўлаклар ва умумий фойдаланишдаги бошқа объектларни 90 минг долларга харид қилди.
Ҳозирги пайтда аҳоли ва кўча эгалари ўртасидаги можаро айни авжида — жуфтлик 120 та машиналар тўхташ жойидан фойдаланиш учун ижара тўлови талаб қилмоқда. Уй эгалари ассоциацияси жуфтлик ва шаҳар устидан судга даъво киритди.
Келинг, Пресидио Террас кўчаси нималарни ўз ичига олишини кўриб чиқамиз.
Пресидио Террас Сан-Францисконинг энг бой туманларидан бирига киради.
Бу кварталга тенг овал шаклидаги кўчадир. Уни бу ерда камида 1905 йилдан буён истиқомат қилиб келаётган уй эгалари бошқаради.
Узоқ йиллар давомида бу ерга Калифорниянинг энг бой ва нуфузли сиёсатчилари кўчиб келиб жойлашган. Бунга ҳудуднинг бошқа жойлардан ажратилганлиги ва хавфсизлик даражасининг юқори эканлиги сабаб бўлган.
Шахсий қўриқчининг рухсатисиз ҳеч ким ичкарига кира олмайди. Black Bear Security Services кийимидаги хавфсизлик хизмати офицери тун-у кун тош дарвозаларда навбатчилик қилади.
Пресидио Террасга унинг панжарали девори ортидан назар солишга уриниб кўрамиз.
Бурчакда Тюдорлар услубидаги данғиллама ҳовли жойлашган. Аввал у сенатор Даенн Файнстайн ва унинг турмуш ўртоғи молиячи Ричард Блюмга тегишли бўлган. 16 хонали уй 1909 йилда қурилган.
Сенатор Файнстайн ҳашаматли ҳовлидан бир кўча нарида улғайган, бироқ доим унга маҳлиё бўлган. 1985 йилда у оилавий траст маблағига уйни харид қилган.
Кейинчалик сенатор ҳовлини қизи, судья Кетрин Файнстайнга берган. У 2013 йилда уйни 9,5 миллион долларга сотган.
АҚШ Вакиллар палатасининг собиқ спикери Нэнси Пелоси қачонлардир колониал услубдаги уйда яшаган. Унда кўп йиллар давомида Демократик партия учун маблағ тўплаш бўйича тадбирлар ўтказилган.
Сан-Франциско графлиги реестри уй охирги марта соҳибини 1990 йилда алмаштирганлигини кўрсатади. У харидорга 2,7 миллион долларга тушган.
Дарахтлар ортидан аранг кўзга ташланаётган оппоқ бино Сан-Францисконинг марҳум мэри Жозеф Алиотога қарашли бўлган. Данғиллама ҳовлида ванна хоналарининг ўзи олтита.
2013 йилда уй 9,5 миллион долларга сотилган.
Zillow агентлиги маълумотига кўра, июнь ойида Пресидио Хайс туманидаги кўчмас мулклар қиймати 5,1 миллион доллардан ошган. Бу Сан-Францискодаги уйлар ўртача нархидан тўрт баробар юқоридир.
Хонадон эгалари уй соҳиблари ассоциациясига йиллик тўловларни амалга оширади. 2013 йилда у ҳар бир уй учун 3 410 долларни ташкил этган.
Ассоциация ўттиз йил давомида йилига 14 долларлик кўчмас мулк учун солиқни тўламаган. Унинг вакиллари шаҳар ҳисобларни эскирган манзилга жўнатганлиги, оқибатда нафақат тўланмаган солиқлар, балки жарима ва пенялар ҳам тўпланиб қолганлигини таъкидламоқда.
2015 йилда шаҳар Солиқ-молия бошқармаси етказилган зарар ўрнини қоплашга қарор қилди. У 994 доллар солиқлар, жарима ва фоизларни қайтариш мақсадида кўчани онлайн-кимошди савдосига қўйди.
Кўчага VMware компанияси маҳсулотлари линейкаси менежери Лэм ва бадавлат мижозлар билан ишлашга ихтисослашган кўчмас мулк агенти Чэн қизиқиб қолди.
Аслида сан-хоселик жуфтлик 90 минг долларига жуда кўп нарсани қўлга киритмади.
Тош дарвоза олдидаги палмалар ва бошқа ўсимликлар энди уларга тегишли...
... йўлаклар ва ажойиб тарзда тартибга келтирилган газонлар.
Бундан ташқари, квартални ўраб турган тош девор ҳам уларнинг мулкига киради.
Шунингдек, Пресидио Террасни бошқа кўчалардан ажратиб турувчи девор ҳам.
Жуфтлик кварталнинг бадавлат аҳолисидан автомобиллар тўхташ жойи учун тўлов ундиришни режалаштирмоқда. Бироқ аҳоли бундан норози. Кўча сотилганидан буён икки йилдан ортиқ вақт ўтди, бироқ кўпчилик бу ҳақда май ойидагина хабар топди.
«Бу каби воқеа юз бериши мумкинлигидан хабар топганимда ҳайратга тушдим. Исталган одам вазиятдан фойдаланиб кўча ва йўлакларимизни сотиб олиши мумкинлигидан чуқур ташвишдаман», — дейди уй эгаларидан бири.
Ўз навбатида, Чэн уларнинг шунчаки омади чопганлигини таъкидлайди.
Изоҳ (0)