Украина президенти офиси раҳбарининг ўринбосари Кирилл Тимошенко 11 март куни ўғирлаб кетилган Мелитопол мэри Иван Федоровнинг асирликдан озод қилинганини билдирди.
Тимошенконинг сўзларига кўра Федоров махсус операция вақтида озод қилинган ва ҳозир хавфсиз жойда. Ҳукумат вакили махсус операциянинг қолган тафсилотлари ҳақида маълумот бермаган. Шунингдек, Тимошенко шаҳар раҳбарининг қандай ўғирлаб кетилганининг тафсилотларини ҳам ошкор этмаган.
«Бир нарсани айтмоқчиман: биз ҳеч қачон ўзимизникиларни ташлаб қўймаймиз. Иван тез орада Украинанинг Мелитопол шаҳри мэри лавозимига қайтиб, фаолиятини бошлайди», — дея таъкидлаган Тимошенко.
Мелитопол Россия Украинага бостириб кирган дастлабки кунлардан бошлаб Москва қўшинлари назоратига ўтган. Шаҳар мэри Иван Федоров 11 мартда ўғирлаб кетилган, видеода ҳарбий кийимдаги номаълум шахсларнинг уни ҳокимлик администрацияси биносидан олиб чиқиб кетаётгани акс этганди. Федоровни ким ўғирлаб кетгани ва унинг қаерда тутқунликда сақлангани маълум, бироқ воқеадан кейин ДХР ҳамда ЛХР маъмуриятлари Федоровни террорчиликда айблаётганлигини билдирган.
Федоров йўқолиб қолганидан сўнг Россия томонига хизмат қилувчи «Мухолифат блоки» шаҳар кенгаши депутати Галина Данилченко «янги даврда» шаҳарни бошқариш учун «халқ сайлаган гуруҳлар» ташкил этилганини маълум қилди. Шундан кейин Украина ҳукумати аёлга нисбатан давлатга хиёнат айблови билан тергов ишини очди.
Аввал 15 мартда Киевда кучайтирилган комендантлик соати жорий этилгани, 14 мартда Россия қўшинлари томонидан эгалланган Чернобил АЭСда электр таъминоти қайта тиклангани, шунингдек 12 март куни Зеленский уруш вақтида 1300 нафар украиналик ҳарбийларнинг ҳалок бўлганини маълум қилгани ҳақида хабарлар берилган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)