Москва аҳолисининг 7 миллион нафарини коронавирусга қарши эмлаш лозим. «Интерфакс»нинг ёзишича, бу ҳақда шаҳар мэри Сергей Собянин маълум қилди.
«Биз келажакда олти-етти миллион кишини эмлашимиз керак ва буни бир вақтнинг ўзида амалга ошириб бўлмайди», — деган у «Россия 1» телеканали эфирида.
Хабарда айтилишича, Москвада 5 декабрдан бошлаб 70 та эмлаш пункти ишламоқда ва бир ой ичида уларнинг сонини 170 тага этказиш ваъда қилинган.
«Спутник V» вакцинаси билан эмлаш учун электрон рўйхатдан ўтиш 4 декабрь куни очилган бўлиб, биринчи бўлиб ушбу вакцинани соғлиқни сақлаш, таълим ва ижтимоий ҳимоя ходимлари олиши мумкин.
2 декабрь куни Россия президенти Владимир Путин ҳукуматга мамлакатда кенг миқёсли эмлашни бошлашга буйруқ берди. Россияда иккита вакцина рўйхатдан ўтказилган: Гамалея маркази томонидан ишлаб чиқилган «Спутник V» ва Новосибирскнинг «Вектор» маркази томонидан яратилган «ЭпиВакКорона». Ҳар иккала препарат учинчи синов босқичида ва у ҳали давом этмоқда. «Спутник V» ишлаб чиқарувчилар унинг 95 фоиз самарадорлигини маълум қилган.
Изоҳ (0)