Москва шаҳри мэри Сергей Собяниннинг маълум қилишича, шаҳар аҳолисида коронавирусга қарши жамоавий иммунитет шаклланган. Бу ҳақда Meduza хабар берди.
«Москвада ҳам, Нью-Йоркда ҳам, тахминан, 60 фоиз аҳолида жамоавий иммунитет шаклланган», — деди шаҳар мэри.
Шунингдек, Собянин коронавирус падемиясига қарши кураш масаласида Москва ва Нью-Йоркни таққослаш ўринли деб ҳисобламоқда. Унинг қайд этишича, икки шаҳар ўртасидаги асосий фарқ шундаки, Нью-Йоркда жараён «бир ойга тўғри келган» ва соғлиқни сақлаш тизими юкламани эплай олмаган, Москвада эса жараённи «уч ойга чўзишга» муваффақ бўлинган.
Бундан ташқари, Москва мэри ўринбосари Анастасия Ракова 10 июль куни шаҳар аҳолисининг 22 фоизида коронавирусга қарши антитаначалар борлигини маълум қилган.
Аввалроқ Москва аҳолиси 16 июлдан бошлаб коронавирус тестини бепул топшириши мумкинлиги маълум қилинганди. Шунингдек, 15 июлдан бошлаб Россияга келган одамлар учун 14 кунлик мажбурий изоляция режими бекор қилиниши ҳақида хабар берилган эди.
Россияда эпидемия бошланганидан буён умумий ҳисобда 759 203 киши коронавирус билан касалланган. Беморларнинг 539 373 нафари соғайган, касаллик тасдиқланганларнинг 12 123 нафари вафот этган.
Изоҳ (0)