Теҳрон 14 июль куни БМТ Хавфсизлик кенгаши Эронга санкция жорий этса, бунга яраша жавоб қайтарилишини маълум қилди. Бу ҳақда Fox News хабар берди.
БМТ Теҳроннинг ядровий ҳаракатларини чеклаш мақсадида Эронга кенг кўламли санкциялар жорий этишни режалаштирмоқда. Эрон ТИВнинг расмий вакили Исмоил Бағоий матбуот анжуманида БМТ томонидан қўлланадиган санкцияларга “тегишлича жавоб қайтарилишини” таъкидлаган.
“Эронга санкция киритиш таҳдиди ҳуқуқий ва сиёсий асосга эга эмас. Бунга Эрон Ислом Республикаси муносиб ва мутаносиб жавоб қайтаради”, деди у.
Бағоий Теҳроннинг қандай жавоб қайтариши ҳақида батафсил маълумот бермаган. Сўнгги кунларда БМТ хавфсизлик экспертлари 18 октябргача мамлакатга санкция жорий этиш билан таҳдид қилаётганди.
Ташкилот яқин кунларда “Қўшма кенг қамровли ҳаракатлар режасининг 10 йиллиги”га бағишлаб анжуман ўтказишни режалаштирган. Айнан шу йиғилишда Эронга қарши санскиялар жорий этилиши ҳақида тахминлар бор эди. Теҳрон ҳукумати айнан шу фаразлар сабаб санкцияларга жавоб қайтаришини маълум қилган. Қўшма кенг қамровли ҳаракатлар режасига кўра, агар Эрон келишув шартларини бузгани аниқланса, бир томонлама тартибда тезкор санкциялар жорий этилиши мумкин.
Таъкидланишича, Эроннинг санкцияларга эҳтимолий жавоби “Ядро қуролини тарқатмаслик тўғрисидаги шартнома”дан воз кечиш бўлиши мумкин. Бу шартнома 190 дан ортиқ давлатлар томонидан имзоланган. Унда ядро қуролига эга бўлган давлатлар томонидан қуролларни бошқаларга бермаслик назарда тутилади. Шунингдек, ядро қуролига эга бўлмаган давлатлардан атом қуролини ишлаб чиқармаслик талаб этилади.
АҚШ президенти Дональд Трамп Эрон билан ядро дастури бўйича музокаралар олиб боришга очиқлигини бир неча бор таъкидлаган. Аммо келишувга қанча вақт ичида эришилиши ҳали ҳам номаълум. Буюк Британия, Франция ёки Германия каби Европа давлатлари ҳам октябрь ойи охиригача Эронга санкция жорий этишни режалаштирган.
Изоҳ (0)