Ўзбекистон мустақиллиги куни муносабати билан Вашингтон шаҳри мэри Муриел Баузер 2023 йил 1 сентябрни АҚШ пойтахтида “Ўзбекистон Республикаси Мустақиллигининг 32 йиллиги куни” деб расман эълон қилди. Бу ҳақда “Дунё” агентлиги хабар берди.
Қайд этилишича, Ўзбекистон истиқлолининг 32 йиллиги билан қабул қилинган декларацияда АҚШ пойтахти мэри Ўзбекистонда Мустақиллик кунининг аҳамияти ҳақида гапириб, Америка Қўшма Штатлари Ўзбекистон мустақиллигини биринчилардан бўлиб тан олганини таъкидлаган.
Шаҳар мэрияси Ўзбекистоннинг Вашингтондаги элчихонасига икки томонлама муносабатларни мустаҳкамлаш, шахслараро алоқаларни йўлга қўйиш ва икки давлат ўртасида маданий алмашинувни ривожлантиришда салмоқли муваффақиятларга эришгани учун миннатдорлик билдирди.
Қўшма Штатлар пойтахти Вашингтон 1791 йилда ташкил этилган ва Американинг биринчи президенти Жорж Вашингтон номи билан аталган. Вашингтонда федерал ҳукуматнинг барча уч бўлимининг асосий идоралари, жумладан, АҚШ президентининг Оқ уйдаги қароргоҳи, кўплаб ёдгорликлар ва миллий аҳамиятга эга музейлар жойлашган.
Август охирида Ўзбекистон президенти ёрдамчиси Саида Мирзиёева Американинг Ўзбекистондаги элчиси билан АҚШга бўлажак ташриф масалаларини муҳокама қилганди. Суҳбат чоғида Ўзбекистон—АҚШ ҳамкорлигига оид долзарб масалалар, ўзаро муносабатларни яна кенгайтириш истиқболлари юзасидан фикр алмашилган. Элчи АҚШ мамлакат мустақиллиги, ҳудудий яхлитлиги ва суверенитетига содиқлигини тасдиқлаган.
Изоҳ (0)