Украина билан урушда 2025 йилнинг бошидан бери Россиянинг 100 мингдан ортиқ аскари ҳалок бўлган. Бу ҳақда НАТО бош котиби Марк Рютте 14 июль, душанба куни Оқ уйда Дональд Трамп билан учрашув чоғида маълум қилди.
“Биз бу масалада келишувга анча олдин эришишимиз керак эди. Аммо (уруш) ҳамон давом этмоқда. Ҳар кеча одамлар ҳалок бўлмоқда. Кўплаб рус аскарлари ҳам, украиналиклар ҳам ўляпти”, деди АҚШ президенти.
Рютте унинг гапини давом эттириб, шундай деди:
“Йил бошидан бери 100 минг рус аскари ҳалок бўлди. Агар Москвада кимдир эшитиб турган бўлса, яна такрорлайман: январдан бери 100 минг рус ҳалок бўлди. Путин айни шу ишларга сабабчи бўлмоқда”.
Рютте Истанбулдаги музокаралар ҳақида
НАТО бош котиби Россия президенти “музокараларга жиддий одамларни юбормаганини” эслатди. Унга кўра, ушбу учрашувни АҚШ ташкил қилишга ҳаракат қилган.
“Биз украиналикларга Истанбулга юқори даражадаги делегацияни юбориш учун босим ўтказдик. Улар буни амалга оширди. Аммо кейин россияликлар пайдо бўлишди. Улар билан бирга тарихчи келиб, 1250 йилдан бошлаб Россия тарихини тушунтиришни бошлади”, деди Рютте. (Владимир Мединский назарда тутилган — таҳр).
Трамп ушбу фикрларга қўшимча қилди:
“Мен тўрт марта келишувга эришдик, деб ўйладим. Аммо биз ҳануз шу мавзуда гаплашяпмиз”.
Россияликларнинг Украинадаги йўқотишлари
2025 йил 14 июль ҳолатига кўра, “Медиазона” ва BBC рус хизмати Украинадаги ҳалок бўлган 118 139 россияликнинг исмини аниқлашга эришган. Манбалар мамлакатнинг умумий йўқотишларини 165 минг киши деб баҳоламоқда.
Россия армияси таркибида ҳалок бўлган 500 нафардан ортиқ аскар чет эл фуқароларидир.
Маълумотларга кўра, Россия армияси сафида жанг қилган хорижликлар 28 та давлатдан бўлган. Қурбонлар сони бўйича биринчи ўринда, катта эҳтимол билан, Шимолий Корея фуқаролари туради. Жанубий Корея разведкаси маълумотига кўра, урушда ҳалок бўлган шимолий кореяликлар сони 600 нафарга етиши мумкин. Бироқ бу борада расмий маълумотлар мавжуд эмас.
Хорижлик қурбонлар ичида Тожикистон фуқаролари (72 киши) етакчилик қилмоқда. Иккинчи ўринда Ўзбекистон (66 нафар) фуқаролари туради.
Украина Қуролли Кучлари Бош штаби июнь ойида Россиянинг умумий йўқотишлари уруш бошидан буён 1 миллион киши (ҳалок бўлган ва яраланганлар)ни ташкил этишини билдирган. Худди шундай баҳони Вашингтондаги Стратегик ва халқаро тадқиқотлар маркази (CSIS) ҳам берган. НАТО эса апрель ойида 250 минг ўлик ва 650 минг ярадор россиялик ҳақида маълум қилган.
Изоҳ (0)