«Дарё» нашри 17 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Киев яна ёппасига ҳужумларга учради. Аввалроқ Путин бунга зарурат йўқлигини айтганди
17 октябрь, душанба куни эрталаб Киев Россиянинг камикадзе-дронлари ҳужумига учради. Дастлабки маълумотларга кўра, муҳим инфратузилма объектлари, шунингдек, турар жой иншоотига зарар етган. Бутун Украина бўйлаб ҳаво тревогаси эълон қилинди.
Киев мери Виталий Кличко дронлар билан берилган камида тўртта зарба ҳақида маълум қилди ва уриб туширилган Эронда ишлаб чиқарилган учувчисиз қурилмалардан бирининг бўлаклари суратини эълон қилди. «Дронлар билан ҳужум оқибатида Киевнинг Шевченко туманида нотурар жой биносида ёнғин юзага келди. Ёнғин бўлинмалари ишламоқда. Бир нечта турар жойларга зарар етган. Шифокорлар воқеа жойларига етиб борган. Жабрланганлар ҳақидаги маълумотларни аниқлаштирмоқдамиз», — деб ёзди Кличко.
Украина ички ишлар вазири маслаҳатчиси Антон Герашченко ҳужумнинг мақсади вокзал яқинидаги муҳим инфратузилма объектларидан бири бўлганини маълум қилди. Шунингдек, у дронлар ҳужуми давом этаётганини, бир гуруҳ учар қурилмалар Киев вилоятининг жануби ва шарқида қайд этилганини айтди. Герашченко кўп қаватли турар жой биноси зарар кўрганини маълум қилди.
Ҳаво ҳужумлари ҳақида Днепропетровск, Одесса, Николаев, Запорожье ва Суми вилоятларидан ҳам хабарлар келиб тушмоқда.
Дронлардан кейин Эрон Россияга баллистик ракеталар ҳам етказиб бермоқчи — WP
Эрон Россияга қурол етказиб беришни кучайтирмоқда: дронлардан кейин Теҳрон Украинага зарба беришда қўлланилиши мумкин бўлган қисқа масофали баллистик ракеталарни ҳам Москвага яширинча юборишга рози бўлган, деб ёзмоқда The Washington Post.
Сентябрь ойи охирида Эрон Россияга делегация юборган, унга қўшимча қурол-яроғ билан таъминлаш шартларини узил-кесил келишиб олиш вазифаси юклатилган, дея маълум қилди АҚШ иттифоқчиларидан бирининг разведка хизматлари. Ушбу разведка маълумотлари Украина ва АҚШга ҳам берилган.
Разведка маълумотларига кўра, Fateh-110 ва Zolfaghar «ер-ер» ракеталарининг биринчи партияси Россияга етказиш учун тайёрланмоқда. Улар мос равишда 300 километрдан 700 километргача бўлган масофадаги нишонларга зарба бера олади. Бу уруш бошланганидан бери Эрон ракеталарининг Россияга етказилиши бўйича биринчи ҳодиса бўлади.
НАТО Европада ядровий ўқув машқларини бошлайди
НАТОнинг ядровий тийиб туриш бўйича Steadfast Noon («Мустаҳкам чошгоҳ») режали ўқув машғулотлари бугун, 17 октябрь куни бошланиб, 30 октябрга қадар давом этади, унда 14 та мамлакат ва 60 тагача ҳарбий самолётлар қатнашади, деб хабар беради ЭА Daily. Альянс баёнотига кўра, машқлар «Европа шимоли-ғарби осмонида» — Бельгия ва Британия ҳаво ҳудудида, шунингдек, Шимолий денгиз осмонида ўтказилади. Машғулотлар чоғида жанговар қуролдан фойдаланилмайди.
Бельгиянинг RTБФ телеканали хабарига кўра, машғулотларда иштирок этаётган НАТО мамлакатлари ҳарбий самолётларининг бирортаси ҳам Россия ҳудудига 1000 километрдан ортиқ яқинлашмайди. Шунга қарамай, Бельгиянинг ядро қуролига қарши коалицияси кескин халқаро муҳитни ҳисобга олган ҳолда, машқларни бекор қилишни талаб этди.
Ядрога қарши коалиция тахмин қилишича, Бельгия ҳудудидаги бундай машғулотлар ядровий зиддият юзага келган тақдирда, ушбу мамлакатни потенциал нишонга айлантиради,
Москвада сафарбарлик тугагани эълон қилинди
Москвада сафарбарлик тадбирлари якунланди, дея маълум қилди шаҳар мери Сергей Собянин. Унинг сўзларига кўра, сафарбарлик пунктлари 17 октябрь куни соат 14:00 да (Тошкент вақти билан 16:00) ёпилади.
«Сафарбарлик жараёнида яшаш жойи ва корхоналарга юборилган чақирув қоғозлари ўз кучини йўқотади», — деди Москва мери. Собяниннинг айтишича, сафарбарликнинг барча вазифалари «тўлиқ бажарилган».
14 октябрь куни Россия президенти Владимир Путин сафарбарлик тадбирлари икки ҳафта ичида якунланишини маълум қилган эди.
Айни вазиятда Россияда сенатор ва депутатлар учун сафарбарликка чақириш муддатини ортга суришни бекор қилиш таклиф этилди. Бундан ташқари, қонун лойиҳасида «Росгвардия», ФВВ, ФХХда ҳарбий хизмат ўтаётган ходимларни биринчи ўринда сафарбарликка жалб қилинадиган фуқаролар қаторига қўшиш таклиф қилинмоқда.
Тошкентда тез ёрдам ходимлари яна калтакланди
Тошкентнинг Миробод туманида тез ёрдам ходимлари калтакланганига доир хабарлар тарқалди. Соғлиқни сақлаш вазирлиги мазкур ҳолат юзасидан маълумот берди.
Тез ёрдам ходимлари манзилга келганида кўчада беморлиги айтилган 22 ёшли фуқаро М.А. ноадекват ҳолатда ён-атрофдаги кишиларга тажовуз қилаётгани маълум бўлган. 103 кўчма бригадаси унга биринчи тиббий ёрдам кўрсатмоқчи бўлганда муштумзўр фуқаро шифокорларга куч ишлатиб, тез ёрдам машинасига ҳам жиддий зарар етказган.
Воқеа жиддий тус олаётганини кўрган тез тиббий ёрдам ходимлари дарҳол туман ички ишлар бўлимига мурожаат қилган. Ҳуқуқни муҳофаза қилувчи орган ходимлари етиб келгунига қадар фуқаро М.А. 103 бригадаси ҳайдовчиси I.Ҳ.ни калтаклаб, унга жароҳат етказган.
Изоҳ (0)