АҚШ армиясининг истеъфодаги зобити Девид Слейтер Украинадаги можаро бўйича махфий маълумотларни онлайн танишув иловаси орқали узатганини тан олди. Бу ҳақда Associated Press агентлиги хабар бермоқда.
Маълум қилинишича, 2024 йил март ойида 64 ёшли Слейтер АҚШ ҳукумати томонидан онлайн танишув платформасида чет эллик шахсга ҳарбий хусусиятдаги махфий маълумотларни берганликда айбланган. Айблов хулосасига кўра, у АҚШнинг Оффатт авиабазасидаги стратегик қўмондонлик кучларига бириктирилган бўлиб, 2021 йил августдан 2022 йил апрелгача “ўта махфий” грифи остидаги маълумотларга кириш ҳуқуқига эга бўлган. Суд ҳужжатларига кўра, у “мутлақо махфий” даражасигача махфийлаштирилган Россия-Украина можароси ҳақидаги брифингларни тинглаган.
У брифингларда олган маълумотларни танишув сайтидаги суҳбатдошига етказган. Ёзишмаларда аёл офицерни “менинг махфий хабарчим” ва “менинг яширин агентим”деб атаган. Бир куни аёл ундан “Дейв, умид қиламанки, эртага НАТО Путин учун жуда ёқимли “совға” тайёрлайди! Менга айтиб берасанми?”, дея сўраган.
Ҳужжатларда офицер маълумотларни ошкор қилган аёлнинг шахси кўрсатилмаган ва у Украина ёки Россия учун ишлаганми, йўқми, айтилмаган. Шунингдек, танишув платформасининг номи ҳам келтирилмаган.
“Ҳарбий ҳаво кучларида фуқаро сифатида ишлаган истеъфодаги армия зобити хорижий онлайн танишув платформасида махфий маълумотларни (Украина можароси ҳақида) узатиш мақсадида фитнада иштирок этганлигини тан олди”, дейилади агентлик хабарида.
Эркакка нисбатан ҳукм октябрь ойида чиқарилиши кутилмоқда.
“Прокурорлар ва унинг ҳимоячилари унга беш йил-у ўн ойдан етти йил-у уч ойгача қамоқ жазосини сўрашмоқда”, дейилади хабарда.
Изоҳ (0)