Апрель ойи бошида АҚШнинг Иллинойс штати Олтон шаҳри мэри Брэнт Уокер аҳолини коронавирус туфайли жорий этилган карантинга амал қилишни сўради, деб ёзади TJournal.
«Бу жуда жиддий, сиздан ўтиниб сўрайман, уйда қолинг, бу ҳаммамизнинг соғлимиз учун жуда муҳим», — деган эди мэр.
Одамлар унинг гапига қулоқ солмай ресторан ва кафеларга бораётгани англашилганидан сўнг мэр қатъий чоралар кўришга ўтди. У полицияга ресторан ва барларга тўпланаётган одамларни тарқатишни, карантин қоидаларини бузаётганларни жаримага тортишни буюрди.
Эртаси куни полиция Hiram’s Tavern барида йигилган одамларни тарқатаётганида, тасодифан мернинг хотини ҳам улар орасида эканлигига гувоҳ бўлди.
Бу ҳақда Олтон мерининг ўзи Facebook’даги саҳифасида маълум қилди.
«Мен полиция бошлиғига айтдим, хотинимга ҳам карантин қоидаларига риоя этмаган фуқароларга нисбатан кўриладиган чора қўлланилади. У ҳеч қандай имтиёзга эга бўлмайди.
Менинг хотиним — кап-катта одам ва у ўзи қарор қабул қила олади. Ушбу ҳолатда у ўзининг масъулиятсизлигини кўрсатди. Энди у ҳам ҳамма қатори жавобгарликка тортилади. Унинг қилмишидан хижолатдаман, барча олтонликлардан узр сўрайман», — дейди Брэнт Уокер.
Иллинойс штатидаги карантин доирасида барча оммавий ва шахсий йиғинлар ўтказиш тақиқланган. Ушбу қоидага амал қилмаган фуқаролар 2,5 минг доллар жаримага тортилиши ёки 364 кунга қамалиши мумкин.
Изоҳ (0)