Пентагон Илон Маскнинг сунъий интеллект чатботи Grok’дан фойдаланиш учун 200 миллион долларлик шартнома имзолади. Бу ҳақда BBC хабар берди.
Маскнинг хAI компанияси томонидан 14 июль куни эълон қилинган ушбу шартнома “Grok ҳукумат учун” дастурининг бир қисми ҳисобланади. АҚШ Мудофаа вазирлигининг таъкидлашича, ҳукумат сунъий интеллект воситаларидан кенгроқ фойдаланишга ҳаракат қилмоқда.
Янги битим АҚШ ҳукумат идораларига чатботнинг энг сўнгги версияси Grok 4 га уланиш имконини беради ва миллий хавфсизликдан фойдаланиш учун махсус воситаларни тақдим этади.
Пентагон, шунингдек, Anthropic, Google ва OpenAI компаниялари билан ҳам худди шундай шартномалар имзоланишини очиқлаган. Уларнинг ҳар бири 200 миллион доллардан юқори бўлиши режалаштирилган.
“Сунъий интеллектдан фойдаланиш жангчиларимизни қўллаб-қувватлаш ва душманларимиз устидан стратегик устунликни сақлаб қолишда ёрдам беради”, деди АҚШ ҳукумати вакили.
Яқинда Grok’да Адолф Гитлерни мақтовчи постлар тарқалиб, бу кўпчиликнинг норозилигига сабаб бўлган эди. Илон Маск муаммо ҳал қилинаётганини билдирган.
Grok 2023 йил охирида оммага тақдим этилган. У бошқа сунъий интеллект чатботларига қараганда филтрланмаган муқобил саналади. Бот аллақачон Х ижтимоий тармоғига интеграция қилинган.
Изоҳ (0)