Ўзбекистонликлар Қатарга энг ками 800 доллар маошлик ишга чақирилмоқда. Бу ҳақда Миграция агентлиги хабар берди.
Миграция агентлиги ва Қатарнинг Jusour рекрутинг ташкилоти ҳамкорлигида фуқаролар учун Қатарда меҳмонхона соҳасида ишга жойлашиш имконияти тақдим этилмоқда. 15 та йўналиш бўйича бўш иш ўринлари мавжуд.
Номзодларга қўйиладиган умумий талаблар:
- 21 ёшдан катта эркак ва аёл номзодлар;
- инглиз тилини камида B1 даражасида билиш (эркин мулоқот қила олиш);
- судланмаганлик;
- Ўзбекистон ҳудудидан чиқишга тақиқ бўлмаслиги.
Иш берувчи томонидан тақдим этиладиган шарт-шароитлар:
- Минимал ойлик маош: 800 АҚШ доллари.
- Қатарга бориш харажатлари қопланади.
- Ишчи визаси расмийлаштирилади.
- Тиббий суғурта таъминланади.
- Маҳаллий транспорт харажатлари қопланади.
- Ётоқ жойи ва овқат харажатлари таъминланади.
Номзодлар инглиз тилида тайёрланган, қуйидаги маълумотларни ўз ичига олган CV тақдим этиши шарт:
- аввал ишлаган компания номи;
- ишлаган йиллар (масалан: 2019–2022);
- эгаллаган лавозим ва бажарган вазифалар.
Қайд этилишича, рўйхатдан ўтиш ишга жойлашишни кафолатламайди. Номзодлар иш берувчилар томонидан келиб тушган талабномаларга асосан танлов асосида сараланади.
Бу ушбу давлат томонидан билдирилган илк таклиф этмас
24 март куни агентлик ва Қатарнинг Hamad Medical Corporation компанияси томонидан мамлакатдаги ҳамширалардан аризалар қабул қилинаётгани ҳақида хабар берилган. Жами иш ўрни 10 та, иш ҳақи ойига 2750 долларни ташкил этади.
Иш уч сменали тизимда амалга оширилиб, ҳафтасига 48 соат, 6 кунни ташкил этади. Номзодлар учун шартлар: 18−50 ёш оралиғида бўлиш, тиббиёт соҳасида камида 2 йиллик иш стажига эга бўлиш ҳамда инглиз тилини мукаммал билиш.
Изоҳ (0)