«Дарё» нашри 14 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
«Украина халқи билан бирдамлик» номли конференцияда қайта портлашлар юз бераётган Украина учун 100 млрд евро тўпланди
Киевнинг Шевченкивский туманида портлашлар содир бўлди, деб хабар бермоқда шаҳар мери Виталий Кличко. 14 декабрь куни эрталаб Киев ва Украинанинг бир қатор бошқа вилоятларида ҳаво ҳужумидан огоҳлантириш эълон қилинди.
Украина оммавий ахборот воситаларининг ёзишича, Киев аҳолиси дрон ва портлаш товушларини эшитган, бир нечта чақнашлар кўринган. Киев вилоятида ҳаво ҳужумидан огоҳлантириш эълон қилинганидан кейин ҳаво ҳужумидан мудофаа тизимлари ишга тушди, деб хабар берган вилоят маъмурияти раҳбари Алексей Кулеба.
Айни вазиятда Парижда, 70 дан ортиқ давлат ва ташкилотлар иштирокида «Украина халқи билан бирдамлик» номли конференция бўлиб ўтди. Конференция якунида Франция президенти Эммануэль Макрон Киев учун 1 миллиард евродан ортиқ ёрдам йиғишга муваффақ бўлганини маълум қилди.
АҚШда TikTok ижтимоий тармоғини тақиқлаш таклиф қилинмоқда
АҚШда республикачи сенатор Марко Рубио Хитойнинг TikTok қисқа видеолар сервисини тақиқловчи қонун лойиҳасини тақдим этди. Ҳужжат муаллифлари ушбу ижтимоий тармоқдан америкаликларга қарши жосусликда фойдаланилиши мумкинлигидан хавотирланмоқда. Бу ҳақда сенатор сайтида хабар берилди.
Қонун лойиҳаси Хитой ва Россия томонидан назорат қилинадиган ёки уларнинг таъсири остидаги ҳар қандай ижтимоий тармоқ дастурларига қарши қаратилган. Рубио Хитой қонунчилиги бўйича TikTok’нинг бош компанияси ByteDance Хитой Коммунистик партиясига маълумотларни тақдим этиши шартлигини эслатди.
«Федерал ҳукумат АҚШ фойдаланувчиларини TikTok таҳдидидан ҳимоя қилиш учун ҳали бирор муҳим чора кўрмаган. Гап ижодий видеолар ҳақида эмас, балки ҳар куни ўн миллионлаб америкалик болалар ва катталар ҳақида маълумот тўплайдиган дастур ҳақида кетмоқда. Биз бундан хабарларни манипуляция қилиш ва сайловларга таъсир ўтказиш учун фойдаланилаётганини биламиз. Бу Хитой Халқ Республикасининг жавоби эканидан хабаримиз бор», — деди сенатор.Вакиллар палатасида ташаббусни республикачи Майк Галлахер ва демократ Ража Кришнамурти қўллаб-қувватлади.
Германияда давлат тўнтариши ва Олаф Шольцга суиқасд режаси топилди
Германияда давлат тўнтаришини уюштирмоқчи бўлган гуруҳ мамлакат канцлери Олаф Шольцга суиқасд қилишни режалаштирган. Бу ҳақда терговдан хабардор манбаларга таяниб, The New York Times хабар берди.
Полиция давлат тўнтариши уюштиришни режалаштирган гуруҳнинг уйини тинтув қилганда, юздан ортиқ «маълумотни ошкор қилмаслик» тўғрисидаги келишувларни топган.«Унга имзо чекканлар гуруҳнинг Германия парламентига ҳужум қилиш ва унинг аъзоларини ҳибсга олиш, шунингдек, канцлерга суиқасдни ўз ичига олган режани сир сақлашга қасамёд қилган», дейилади хабарда.
Таъкидланишича, гуруҳ аъзоларидан кимдир бу маълумотларни очиқласа, ўлимга ҳукм қилиниши керак бўлган. Тинтув давомида полиция 40 га яқин ўқотар қурол ва мингдан ортиқ ўқ-дориларни топган, бу эса ҳали топилмаган ўқ-дорилар омборлари мавжудлигидан далолат беради.
7 декабрь куни Германия Бош прокуратураси матбуот хизмати давлат тўнтаришига тайёргарлик кўраётган 25 киши, жумладан, Россия фуқаролари ҳибсга олингани ҳақида хабар берди.Гумонланувчилар 2021 йилда тузилган террорчилик ташкилоти аъзоси ва тарафдорлари бўлиб, уларнинг мақсади «Германиядаги мавжуд сиёсий тизимни ағдариш» бўлгани айтилган.
Эндиликда Ўзбекистонда илмий даражага эга бўлган тиббиёт ходимлари қўшимча ҳақ оладилар
Ўзбекистонда ҳукумат қарори даволаш-профилактика муассасаларининг илмий даражага эга бўлган ходимларига қўшимча ҳақ тўлаш тартиби тўғрисида низом тасдиқланди.
Шунга кўра, муассасаларнинг фан доктори (Doctor of Science), фан номзоди ёки фалсафа доктори (PhD) илмий даражасига эга бўлган ходимларига асосий иш жойи бўйича ҳар ойлик қўшимча ҳақ белгиланади.
Қўшимча ҳақ миқдори ходимнинг эгаллаб турган лавозимига мутаносиб равишда, бироқ бир ставкадан ортиқ бўлмаган миқдорда ҳар ойда ҳисобланадиган лавозим маошига нисбатан белгиланади.
Ходим бир нечта муассасада қонунчиликда белгиланган тартибда меҳнат шартномаси асосида фаолият юритаётган бўлса, у асосий иш жойи бўйича қўшимча ҳақ олиш ҳуқуқига эга.Қўшимча ҳақ миқдори бир ойда — фан номзоди ёки фалсафа доктори илмий даражасига эга ходимлар учун лавозим маошининг 30 фоизидан ҳамда фан доктори илмий даражасига эга ходимлар учун лавозим маошининг 60 фоизидан ошмаслиги керак.
Изоҳ (0)