Германия АҚШдан тахминан 2 000 километр масофадаги ракеталарни учиришга қодир Typhon мобил ер усти ракета тизимини сотиб олмоқчи. Бу ҳақда ntv хабар берди.
Германия мудофаа вазири Борис Писториус бу таклифни Вашингтонга ташрифи чоғида етказган. АҚШ мудофаа вазири Пит Хегсет сўровга ижобий муносабат билдирган. 2 000 километргача бўлган юқори аниқликдаги ракеталар Россия ҳудудини қамраб олиши мумкин. Аммо Писториус бундай қурилмалар фақат мудофаа мақсадида ишлатилишини таъкидлаган.
Typhon мобил ракета тизими (расмий номи Mid-Range Capability– MRC) — бу АҚШ армияси томонидан ўрта масофадаги зарбалар учун ишлаб чиқилган замонавий ер усти платформасидир. У икки турдаги ракеталарни учиришга мўлжалланган:
- Tomahawk қанотли ракеталари — 2 000 км масофага учади;
- SM-6 ракеталари — тахминан 500 км масофадаги ҳаво ва ер нишонларига зарба бера олади.
Тизим юк машинаси шассисига ўрнатилган бўлиб, учириш қурилмалари, бошқарув пункти ва транспорт-қувватловчи техникалардан иборат. Юқори ҳаракатчанлиги сабабли уни қисқа вақт ичида исталган ҳудудга кўчириш мумкин. Ракеталарнинг узоқ учиш масофаси эса душман ҳаво ҳужумидан мудофаа тизимларига кирмасдан туриб ҳам зарба бериш имконини беради.
Ҳозирда Typhon тизими Филиппинда жойлаштирилган. 2026 йилда уни Европада ҳам ўрнатиш режалаштирилмоқда. Бу НАТОнинг Европадаги мудофаа салоҳиятини мустаҳкамлаш доирасида амалга оширилади.
Изоҳ (0)