Майами мери АҚШ президентлиги учун номзодини қўйди

Флорида штатининг Майами шаҳар мери Френсис Суарес АҚШ президентлигига номзодини қўйиш учун Федерал сайлов комиссиясига тегишли ҳужжатларни топширди, деб хабар бермоқда Politico. У Республикачилар партиясидан номзод бўлади.

Шу тариқа, Суарес Флорида штатидан АҚШнинг собиқ президенти Дональд Трамп ва штат губернатори Рон Десантисдан кейин учинчи номзодга айланди.

Френсис Суарес 45 ёшда. У икки марта — 2017 йилда (86 фоиз овоз олган) ва 2021 йилда (79 фоиз овоз) Майами мери этиб сайланган. Унинг отаси Ксавер Суарес ҳам икки марта, 1980 ва 1990 йилларда шаҳар мери бўлиб ишлаган.

Суарес, Трамп ва Десантисдан ташқари, Трампнинг вице-президенти Майк Пенс, Жанубий Каролинанинг собиқ губернатори ва АҚШнинг БМТдаги собиқ элчиси Никки Хейли, сенатор Том Скотт ва Нью-Жерси собиқ губернатори Крис Кристи Республикачилар партиясидан президентлик сайловида иштирок этишга қарор қилган. Reuters хабарига кўра, тез орада Шимолий Дакота губернатори Дуг Бургам ҳам номзодини эълон қилади.

Амалдаги президент Жо Байден, Жон Кеннедининг жияни кичик Роберт Кеннеди ва хайриячи Марианне Уильямсон Демократик партия номидан иштирок этишларини эълон қилган.