Эронга қарши ҳеч қандай сабаб бўлмаган тажовузни оқлаб бўлмайди. Бу ҳақда Россия Федерацияси Президенти Владимир Путин Эрон ТИВ раҳбари Аббос Арақчи билан учрашувда ма`лум қилди.
“Эронга нисбатан ҳеч қандай сабабсиз қилинган мутлақ тажовуз учун ҳеч қандай асос ва оқлаш йўқ”, деди Путин.
Россия президентининг таъкидлашича, Арақчи “минтақа ва унинг атрофидаги вазият кескин тус олган мураккаб даврда” Россияга ташриф буюрган
“Содир бўлаётган воқеаларга нисбатан бизнинг нуқтаи назаримиз яхши маълум, у аниқ баён этилган ва Россия номидан Ташқи ишлар вазирлиги томонидан ифодаланган. Шунингдек, БМТ Хавфсизлик Кенгашида қандай позицияни эгаллаганимиздан хабардорсиз”, деди Путин.
22 июнга ўтар кечаси АҚШ армияси Эроннинг учта муҳим ядро объектига зарба берди. Шундан сўнг Америка Қўшма Штатлари президенти Дональд Трамп Теҳронни жавоб чораларидан тийилишга ва қолган келишмовчиликларни тинч йўл билан ҳал этишга чақирди.
АҚШ президенти Дональд Трамп Эроннинг уран бойитиш бўйича асосий объектлари “бутунлай ва тўлиқ йўқ қилинганини” маълум қилди. Бироқ Теҳронда унинг сўзларини инкор этиб, АҚШ ҳарбий-ҳаво кучлари ҳужуми “натижасиз” бўлганини таъкидлашди.
Эрон-Исроил можароси
Исроил 13 июнь кечаси Эронни махфий ҳарбий-ядровий дастурни амалга оширишда айблаб, унга қарши операция бошлади. Ҳаво ҳужумлари ва диверсия гуруҳларининг рейдлари нишонлари атом объектлари, генераллар, машҳур ядро физиклари, авиабазалар, ҳаво ҳужумидан мудофаа воситалари, “ер-ер” ракеталари бўлди.
Эрон ўз атом лойиҳасининг ҳарбий мақсадларга йўналтирилганини рад этмоқда. МАГАТЭ бош директори Рафаэл Гросси 18 июнь куни маълум қилишича, агентлик инспекторлари Эроннинг ядро қуроли яратиш дастурини амалга ошираётгани ҳақида аниқ далилларни кўрмаган. АҚШ разведка ҳамжамияти президент Дональд Трамп ва Исроил баёнотларига қарама-қарши ўлароқ, Эрон ядро қуролини яратишга интилмаган, деб ҳисоблади.
Эрон Исроилнинг ҳаракатларига ракета зарбалари ва ҳужумчи учувчисиз аппаратлар билан жавоб қайтармоқда, ҳарбий объектларга зарба бераётганини таъкидламоқда. Ҳар икки томондан ҳам турар жой биноларига зарар етказиш ва тинч аҳоли орасида қурбонлар сони ортиб бормоқда.
Эрон Соғлиқни сақлаш вазирлиги маълумотларига кўра, мамлакатда 220 дан ортиқ киши ҳалок бўлган, камида 2,8 минг киши жароҳатланган. Шу билан бирга, Эроннинг Россиядаги элчиси Казем Жалоли 300 га яқин тинч аҳоли ҳалок бўлганини маълум қилди. Исроилда Эрон зарбалари оқибатида 20 дан ортиқ киши ҳалок бўлгани, 1,2 мингдан ортиқ киши яралангани айтилди.
Исроил ва Эрон кунига бир неча марта ўзаро зарбалар бермоқда. Исроил ҳукумати Эрон ядро дастури йўқ қилинмагунча кампанияни давом эттириш билан пўписа қилди. Теҳрон эса, ўз навбатида, Исроил бомбардимонни тўхтатмагунча ўққа тутишни давом эттиришини билдирмоқда.
Изоҳ (0)