Eronga qarshi hech qanday sabab bo‘lmagan tajovuzni oqlab bo‘lmaydi. Bu haqda Rossiya Federatsiyasi Prezidenti Vladimir Putin Eron TIV rahbari Abbos Araqchi bilan uchrashuvda ma`lum qildi.
“Eronga nisbatan hech qanday sababsiz qilingan mutlaq tajovuz uchun hech qanday asos va oqlash yo‘q”, dedi Putin.
Rossiya prezidentining ta’kidlashicha, Araqchi “mintaqa va uning atrofidagi vaziyat keskin tus olgan murakkab davrda” Rossiyaga tashrif buyurgan
“Sodir bo‘layotgan voqealarga nisbatan bizning nuqtai nazarimiz yaxshi ma’lum, u aniq bayon etilgan va Rossiya nomidan Tashqi ishlar vazirligi tomonidan ifodalangan. Shuningdek, BMT Xavfsizlik Kengashida qanday pozitsiyani egallaganimizdan xabardorsiz”, dedi Putin.
22-iyunga o‘tar kechasi AQSH armiyasi Eronning uchta muhim yadro obyektiga zarba berdi. Shundan so‘ng Amerika Qo‘shma Shtatlari prezidenti Donald Tramp Tehronni javob choralaridan tiyilishga va qolgan kelishmovchiliklarni tinch yo‘l bilan hal etishga chaqirdi.
AQSH prezidenti Donald Tramp Eronning uran boyitish bo‘yicha asosiy obyektlari “butunlay va to‘liq yo‘q qilinganini” ma’lum qildi. Biroq Tehronda uning so‘zlarini inkor etib, AQSH harbiy-havo kuchlari hujumi “natijasiz” bo‘lganini ta’kidlashdi.
Eron-Isroil mojarosi
Isroil 13-iyun kechasi Eronni maxfiy harbiy-yadroviy dasturni amalga oshirishda ayblab, unga qarshi operatsiya boshladi. Havo hujumlari va diversiya guruhlarining reydlari nishonlari atom obyektlari, generallar, mashhur yadro fiziklari, aviabazalar, havo hujumidan mudofaa vositalari, “yer-yer” raketalari bo‘ldi.
Eron o‘z atom loyihasining harbiy maqsadlarga yo‘naltirilganini rad etmoqda. MAGATE bosh direktori Rafael Grossi 18-iyun kuni ma’lum qilishicha, agentlik inspektorlari Eronning yadro quroli yaratish dasturini amalga oshirayotgani haqida aniq dalillarni ko‘rmagan. AQSH razvedka hamjamiyati prezident Donald Tramp va Isroil bayonotlariga qarama-qarshi o‘laroq, Eron yadro qurolini yaratishga intilmagan, deb hisobladi.
Eron Isroilning harakatlariga raketa zarbalari va hujumchi uchuvchisiz apparatlar bilan javob qaytarmoqda, harbiy obyektlarga zarba berayotganini ta’kidlamoqda. Har ikki tomondan ham turar joy binolariga zarar yetkazish va tinch aholi orasida qurbonlar soni ortib bormoqda.
Eron Sog‘liqni saqlash vazirligi ma’lumotlariga ko‘ra, mamlakatda 220 dan ortiq kishi halok bo‘lgan, kamida 2,8 ming kishi jarohatlangan. Shu bilan birga, Eronning Rossiyadagi elchisi Kazem Jaloli 300 ga yaqin tinch aholi halok bo‘lganini ma’lum qildi. Isroilda Eron zarbalari oqibatida 20 dan ortiq kishi halok bo‘lgani, 1,2 mingdan ortiq kishi yaralangani aytildi.
Isroil va Eron kuniga bir necha marta o‘zaro zarbalar bermoqda. Isroil hukumati Eron yadro dasturi yo‘q qilinmaguncha kampaniyani davom ettirish bilan po‘pisa qildi. Tehron esa, o‘z navbatida, Isroil bombardimonni to‘xtatmaguncha o‘qqa tutishni davom ettirishini bildirmoqda.
Izoh (0)