Eron Natanz, Isfahon hamda Fordo yadroviy obyektlarini AQSH hujumidan oldin evakuatsiya qilgan. Bu haqda Eron davlat teleradiokompaniyasi IRIB xabar berdi.
Ularning orasida Fordo alohida ahamiyatga ega. Boisi obyekt 60-100 metr chuqurlikda barpo etilgan bo‘lib, uranni boyitish maqsadlarida foydalanilgan. Eron 2006-yilda qurilgan maxfiy inshoot uchun bir necha milliard dollar sarflagani aytiladi. Inshoot mamlakatning ma’naviy poytaxti — Qum shahridan atigi 30 kilometr masofada joylashgan. U yerda IR-1 va IR-6 sentrifugalari faoliyat ko‘rsatgan.
Reuters nashrining o‘zi bilan suhbatlashgan Eron mulozimiga tayanib xabar berishicha, Fordo obyektida saqlanayotgan boyitilgan uran hujum oldidan noma’lum nuqtaga ko‘chirilgan. Personal esa minimum darajaga tushirilgan. Sun’iy yo‘ldoshdan olingan tasvirlar AQSH zarbasidan ikki kun oldin chindan ham inshoot yaqinida noodatiy faollik kuzatilganini ko‘rsatadi.
Barchasi qanday boshlandi?
Isroilning Eron harbiy iyerarxiyasi hamda yadro dasturi yetakchilarini nishonga olgan amaliyotlari bilan boshlangan mojaro har ikki tomon uchun ham talafotlar keltirdi. Yahudiy davlati Natanz, Isfahon va boshqa yadroviy obyektlarni nishonga olgan bo‘lsa-da, Fordo ular uchun yetib bo‘lmasligicha qolayotgan edi. Shu bois ham Isroil bunga qodir salohiyatga ega Qo‘shma Shtatlar tomon yuzlandi.
AQSH prezidenti mojaroga aralashish yuzasidan bir qarorga kelishi uchun ikki hafta vaqt ketishini aytgan bo‘lsa-da, bugun tongda Eronga kutilmagan zarbalar berildi. Hujum amaliyotida 6 ta B-2 Spirit strategik bombardimonchilari ishga solingani, ular tomonidan 12 ta GBU-57 “bunker teshuvchi” bombalari qo‘llangani haqida xabar berildi. Talafotlar haqida vizual dalil yo‘q bo‘lsa-da, Oq uy obyekt butunlay vayron etilganini da’vo qilmoqda.
Izoh (0)