Eronning Isroilga qarshi amalga oshirgan to‘rt bosqichli raketa hujumi oqibatida 3 kishi halok bo‘ldi va kamida 70 kishi jarohat oldi. Bu haqda The Jerusalem Post gazetasi tez tibbiy yordam xizmatiga asoslanib ma’lum qildi.
Ma’lumotlarga ko‘ra, 14-iyun kuni ertalab Isroilning markaziy qismidagi turar-joy binolariga to‘g‘ridan-to‘g‘ri raketa tushishi oqibatida 1 kishi halok bo‘lgan, 19 kishi yaralangan.
Yangilangan ma’lumotlarga ko‘ra, zarbalar oqibatida 70 dan ortiq kishi jabrlangan. Eron kuchlari Tel-Aviv markazidagi Isroil armiyasi, mamlakat Mudofaa vazirligi va boshqa idoralar tomonidan foydalaniladigan maxsus hudud - Kiriya majmuasiga zarba berdi. Aniqlanishicha, raketalardan biri majmua hududidagi binolardan biriga kelib tushgan.
Shu bilan birga, Eron o‘z raketalarining Tel-Avivdagi belgilangan nishonlarga tekkani haqida ma’lum qildi. Ular harbiy bazalar, mudofaa va milliy xavfsizlik vazirligini nazarda tutmoqda. Isroil tomonining xabar berishicha, ushbu hujum natijasida faqat fuqarolik obyektlariga zarar yetgan.
13-iyunga o‘tar kechasi Isroil qo‘shinlari Eronga qarshi harbiy operatsiya boshlab, Islom Respublikasining bir necha aholi punktlaridagi obyektlarga zarbalar berdi. Jumladan, Tehrondagi Islom inqilobi qo‘riqchilari korpusi (IIQK) shtab-kvartirasi ham nishonga olingan.
Keyinroq Eron Atom energiyasi tashkiloti (IAET) rahbari Muhammad Eslomiy Isroil hujumlari natijasida Natanzdagi yadroviy obyektga jiddiy zarar yetmaganini ma’lum qildi.
Isroil Mudofaa armiyasi 13-iyun kuni kechqurun Eron tomonidan ko‘p miqdorda raketalar uchirilgani haqida xabar berdi.
SAXAL bayonotida havo hujumidan mudofaa tizimlari tahdidni bartaraf etish uchun ishga tushirilgani qayd etildi. Aholiga xavfsiz joylarga yashirinib, keyingi ko‘rsatmalarni kutish tavsiya etilgan.
Izoh (0)