Бишкекнинг Первомайский туман суди Қирғизистон собиқ президенти Алмазбек Атамбаевни бир қатор жиноятларни содир этишда айбдор деб топди ва сиртдан 11,5 йил озодликдан маҳрум қилиш жазосига ҳукм қилди. Бу ҳақда “Кактус медиа” нашри хабар бермоқда.
Маълум қилинишича, суд мажлиси судья Азирет Медеров раислигида ўтказилган.
Атамбоев Чуй вилоятининг Қўй-Тош қишлоғида ер участкаларини ноқонуний олишда, шунингдек, Бишкек иссиқлик электр станциясини модернизация қилишда коррупция ва 7-8 август кунлари Қўй-Тош қишлоғида оммавий тартибсизликларни уюштиришда айбдор деб топилган. Собиқ президентга нисбатан мол-мулкини мусодара қилиш ва барча давлат мукофотларидан маҳрум этиш жазоси ҳам белгиланган.
Атамбаев билан бирга “Қўй-Тош воқеалари” бўйича Президент девонининг собиқ раҳбари Фарид Ниёзов ва Қиргизистон Республикаси Жогорку Кенешининг собиқ депутати Равшан Жээнбеков 7 йил-у 8 ойга, яна бир собиқ депутат Ирина Карамушкина эса 7 йил-у 6 ойга озодликдан маҳрум этилган.
Собиқ депутатлар Асел Кодуранова 3 йиллик, Меёрбек Мискенбаев 5 йиллик, Миллий хавфсизлик давлат қўмитаси 9-хизматининг собиқ ходими ва Атамбаевнинг собиқ тансоқчиси Канат Сагимбаев 5 йиллик, журналист ва Атамбаев тарафдори Қундуз Жолдубаева 5 йиллик пробацияга тортилган.
Апрель ойида Атамбаев Батукаев иши бўйича айбдор деб топилган, бироқ даъво муддати ўтгани сабабли жазодан озод этилганди.
Атамбаев 2011-2017 йилларда Қирғизистон президенти лавозимида ишлаган ва 2019 йил июнида дахлсизлик ҳуқуқидан маҳрум этилган. Ҳибсга олинганидан сўнг унга қарши бир нечта жиноий иш қўзғатилди.
2020 йил 23 июнда Бишкекнинг Первомайск туман суди Атамбаевни 2013 йилда жиноий авторитет Азиз Батукаевни ноқонуний озод қилиш иши бўйича мол-мулкини мусодара қилган ҳолда 11 йил-у 2 ойга озодликдан маҳрум қилишга ҳукм этган эди. Кейинчалик Атамбаев Қирғизистон Жиноят кодексининг мансаб мавқейини суиистеъмол қилиш ва коррупция моддаларида назарда тутилган жиноятларни содир этишда айбсиз деб топилди. Шунингдек, суд уни 2020 йил октябрида оммавий тартибсизликларни ташкил этиш иши бўйича жиноят таркиби йўқлиги сабабли оқлаган.
Атамбаевнинг иши янги очилган ҳолатлар бўйича қайта кўриб чиқиш учун юборилган эди. Суд қарорига кўра, Атамбаевга даволаниш учун Қирғизистонни тарк этишга рухсат берилди. У 2023 йил 14 февралда колониядан озод қилинди ва эртаси куни хорижга учиб кетди.
Аввалроқ Қирғизистонда 2019 йил август ойида Қўй-тош қишлоғида содир бўлган тартибсизликлар бўйича суд бўлиб ўтаётгани, айблов томони собиқ президент Алмазбек Атамбаевни 11 йилга озодликдан маҳрум этишни сўрагани хабар қилинганди.
Изоҳ (0)