Qirg‘iziston sobiq prezidenti Almazbek Atambayev ozodlikka chiqqanidan keyin mamlakatni tark etdi. Bu haqda uning yaqinlari ma’lum qildi, deb yozmoqda Kaktus Media.
Manbalarga ko‘ra, Atambayev Dubayga yo‘l olgan, u yerdan Ispaniyaga jo‘nab ketishni rejalashtirgan. U bilan birga o‘g‘li, Bishkek shahar kengashi deputati Qodir Atambayev ham Qirg‘izistonni tark etgan.
Atambayevning o‘zi ozodlikka chiqqanidan so‘ng Ispaniya hukumati rahbari taklifiga binoan davolanish uchun ushbu mamlakatga uchib ketish niyatida ekanini aytgandi.
Atambayev Qirg‘izistonni 2011-yil dekabridan 2017-yil noyabrgacha boshqargan. 2019-yil avgust oyida u kriminal avtoritet Aziz Batukayevni noqonuniy ravishda ozod qilish, shuningdek, issiqlik elektr stansiyasini modernizatsiya qilishdagi qonunbuzarliklar, ofis sotib olish, Qo‘y-Tosh posyolkasida yer uchastkasini noqonuniy olib qo‘yish va ijaraga berish kabi ayblovlar bilan qo‘lga olingan va 11 yil-u ikki oyga ozodlikdan mahrum qilingandi.
2020-yil oktabr oyida Qirg‘izistonda mamlakat parlamenti uchun saylovlarda belgilangan chegaradan o‘ta olmagan partiyalar tarafdorlari tomonidan norozilik namoyishlari o‘tkazildi. Aksiyalardan birida namoyishchilar Atambayevni tergov izolyatoridan ozod qildi. To‘rt kundan keyin Atambayev Bishkekdagi ommaviy tartibsizliklarni uyushtirganlikda ayblanib, yana hibsga olindi.
2023-yil 14-fevralda Oliy sud Atambayevga nisbatan chiqarilgan avvalgi hukmni bekor qildi. Sobiq prezident koloniyadan ozod qilindi va davolanish uchun xorijga ketishiga ruxsat berildi.
Izoh (0)