Алмазбек Атамбаев Қирғизистоннинг амалдаги ва собиқ президентлари билан учрашувнинг айрим тафсилотларини айтиб берди. У мамлакатда тинчлик, бирдамлик ўрнатилиши ва Бакиевларнинг Қирғизистонга қайтиши иккита катта фарқ эканини таъкидлади. Бу ҳақда “Кактус Медиа” хабар берди.
“Сўнгги воқеалар ва ватандошларнинг саволлари юзасидан қуйидагиларни айтмоқчиман: Ҳа, собиқ президентлар йиғилиши бўлди. Унда қатнашдим, чунки йиғилишда собиқ президентлардан биронтаси ҳам бўлиши ҳақида хабар берилмаганди. Менга эркин одамлардек тенг шароитда, эски норозиликларни унутиб гаплашишимиз учун президент Садир Жапаров ва Қамчибек Ташиев билан учрашувга таклиф қилишди. Мен яхшиликни эслаб қоламан, шунинг учун уни рад эта олмадим, ҳатто Испания элчиси билан визалар бўйича олдиндан режалаштирилган учрашувни бекор қилдим. Маълумки, бош вазир Педро Санчес мени Испанияга даволанишга таклиф қилди, бунинг учун унга катта раҳмат!
Мен ҳам юрт тинчлиги ва бирдамлиги тарафдориман. Учрашувда шу ҳақда ҳам гапирдим. Президент Жапаровнинг яхши ниятдалигини қадрлайман. Аммо учрашув якунида шундай вазият юзага келдики, ҳеч ким билан хайрлашмай, инглизча кетишга мажбур бўлдим. Келажакда зарурат туғилса, албатта, батафсил маълумот бераман”, — дейди Атамбаев.
Шунингдек, собиқ президент Қирғизистонда тинчлик, ҳамжиҳатликнинг ўрнатилиши ва Бакиевларнинг Қирғизистонга қайтиши икки катта фарқлигини айтди.
“Бирлаштириш бутунлай бошқача натижа беради. Жуда кўп қон тўкилган, жуда кўп нарсани унутмаслик керак ва унутиб бўлмайди. Албатта, жиноятчилар жавоб бериши керак ва бунда қурбонларнинг яқинлари биринчилардан бўлиб кечириши керак. Умид қиламанки, президент Садир Жапаров мени эшитди ва тўғри қарор қабул қилади”, — деди собиқ президент.
Аввалроқ Қирғизистоннинг амалдаги президенти Садир Жапаров Қирғизистоннинг барча президентларини бир жойга йиғиб, учрашув ўтказганини маълум қилганди. Унда Асқар Акаев, Қурманбек Бакиев, Роза Ўтунбоева, Алмазбек Атамбаев ва Сўронбай Жээнбеков иштирок этган. Жапаров собиқ президентлар ўз эътирозлари, аламларини билдиргани, шу билан бирга хатоларини тан олиб, бир-бирини кечирганини айтганди.
Изоҳ (0)