Қирғизистон собиқ президенти Асқар Акаев пенсияга чиққанидан сўнг ватанига қайтишни ният қилмоқда. Бу ҳақда у Екатеринбургдаги университетлардан бирида маъруза ўқиганидан сўнг журналистларга маълум қилди, деб ёзади “24. kg”.
Акаев ҳозирда Москва давлат университетида (МДУ) ишлайди. 2023 йилнинг май ойида Қирғизистон собиқ раҳбари ва унинг рафиқаси Бишкекдаги олий ўқув юртларидан бирида маъруза ўқишга келган эди.
Бироқ кўплаб талабалар унинг ташрифига кескин қаршилик кўрсатди. Бир қатор депутатлар ва ўқитувчилар ҳам қарши чиқди. Шундан сўнг Қирғизистон Таълим вазирлиги Акаевнинг Бишкек университетларидаги чиқишини бекор қилди.
2023 йил февраль ойида Қирғизистоннинг амалдаги раҳбари Садир Жапаров Бирлашган Араб Амирликларида Қирғизистоннинг барча президентлари билан учрашув ўтказди. Ўшанда учрашувда Асқар Акаев, Қурманбек Бакиев, Роза Отунбоева, Алмазбек Атамбаев ва Сўронбай Жээнбеков қатнашган.
Жапаров бу тадбирни барқарорлик ва халқ бирлиги учун музокара ўтказиш деб атаган.
Маълумот учун, Асқар Акаев 1990 йил 27-октябрдан 1991 йил 31 августгача Қирғизистон ССР президенти, 1991 йил 31 августдан 2005 йил 11 апрелгача Қирғизистон республикаси президенти бўлган. У тўрт марта (1990, 1991, 1995, 2000) президентлик сайловларида ғалаба қозонган.
2005 йил 24 мартда полиция билан тўқнашув, президент қароргоҳининг ўраб олиниш ва талон-торож қилиниши билан кечган халқ норозилиги натижасида Акаев махсус хизматлар ёрдамида мамлакатдан қочишга муваффақ бўлган.
Оммавий норозиликларга сайловлардаги сохталаштиришлар, шахсий манфаатни кўзлаб Конституцияга ноқонуний ўзгартириш киритишлар сабаб бўлган.
Ўшандан бери Акаевлар оиласи Москвада истиқомат қилади.
Изоҳ (0)