Қирғизистон президенти вазифасини бажарувчи Садир Жапаров ўз хоҳиши билан истеъфо берган собиқ президент Сўронбай Жээнбеков ҳақидаги фармонни имзолади. Бу ҳақда «Интерфакс» хабар берган.
«Қирғизистон Республикаси президентининг фаолияти ва собиқ президент мақомининг кафолатлари тўғрисида»ги қонунга мувофиқ собиқ давлат раҳбарига нисбатан қонунчиликда кўзда тутилган барча меъёрий кафолатлар таъминланади.
15 октябрь куни Жээнбеков 10 кун давом этган норозилик намойишларидан кейин Қирғизистон президентлиги лавозимидан истеъфо берганди. 16 октябрь куни парламент мажлисида қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.
Мавзуга доир: «Худо ва халқ олдида виждоним тоза». Сўронбай Жээнбеков президентликдан истеъфога чиқиш қарорига изоҳ берди
Қирғизистон собиқ президенти тўғрисидаги қонунга кўра, ўз лавозим ваколатлари якунига етган давлат раҳбари республиканинг собиқ президенти мақомига эга бўлади. У дахлсиз ва ваколатга эга бўлган вақтида амалга оширган ҳаракати ёки ҳаракатсизлиги учун жиноий жавобгарликка тортилмайди.
Қонунга кўра, собиқ-президентлик мақоми бекор қилинганидан кейин собиқ давлат раҳбари парламентнинг ўта оғир жиноят содир этганлиги юзасидан берган айблови ва мамлакат бош прокурорининг хулосаси асосида жиноий жавобгарликка тортилиши мумкин.
Собиқ президентга Қирғизистон ҳудудида давлат ҳимояси кафолатланади. Собиқ президентга нисбатан суднинг айблов ҳукми кучга кирганидан бошлаб, у барча ҳуқуқ ва кафолатларидан маҳрум бўлади.
Изоҳ (0)