Қирғизистон собиқ президенти Асқар Акаевнинг айтишича, Садир Жапаров томонидан республика собиқ президентларининг Дубайдаги учрашуви ташкил этилиши “тарихий аҳамиятга эга мисли кўрилмаган қадам” бўлди.
Акаев Қирғизистоннинг амалдаги президенти Жапаров ва унинг жамоаси давлат ҳамда жамият ҳаётининг барча жабҳаларида, ички ва ташқи сиёсатда катта муваффақиятларга эришганини қайд этди.
“Мен Жапаровнинг ташаббусини қўллаб-қувватладим ва ҳамкасбларни Қирғизистоннинг фаровон келажаги ва қирғиз жамиятида барқарорликни мустаҳкамлаш йўлида ҳамфикр бўлишга чақирдим”, — дейди Акаев.
Унинг қайд этишича, Жапаров ўзидан олдинги раҳбарларга нисбатан юзага келиши мумкин бўлган норозиликларни юмшатган ҳолда сиёсий донолик ва инсоний сахийлик кўрсатган.
“Қирғизистон халқини ҳозирги қулай вазиятдан фойдаланиб, гуллаб-яшнаган Қирғизистонни барпо этишда иқтисодий юксалиш учун Жапаров атрофида бирлашишга чақираман”, — деб сўзларини якунлади собиқ президент.
18 февраль куни Қирғизистоннинг амалдаги президенти Садир Жапаров Қирғизистоннинг барча президентларини бир жойга йиғиб, учрашув ўтказганини маълум қилганди. Унда Асқар Акаев, Қурманбек Бакиев, Роза Ўтунбоева, Алмазбек Атамбаев ва Сўронбай Жээнбеков иштирок этган. Жапаров собиқ президентлар ўз эътирозлари, аламларини билдиргани, шу билан бирга, хатоларини тан олиб, бир-бирини кечирганини айтганди.
Кейинроқ республика собиқ президенти Алмазбек Атамбаев ҳам учрашув тафсилотлари ҳақида гапириб, даврадан хайрлашмай чиқиб кетганини айтди.
Изоҳ (0)