Қозоғистондан олиб келинган синтетик гиёҳвандлик воситалари айланмасига чек қўйилди.
Қозоғистондан Ўзбекистонга Тошкент вилоятидаги “Навоий” чегара божхона пости орқали кириб келган Андижон вилоятининг Қўрғонтепа туманида яшовчи, 1983 ва 1988 йилларда туғилган 2 нафар фуқарога тегишли тиббий ускуналар кўздан кечирилди.
Натижада ушбу ускуналар ичига яширилган, умумий баҳоси 1 миллион долларга тенг бўлган 4,206 кг “Мефедрон” ҳамда 3,970 кг “Алфа-ПВП” синтетик гиёҳвандлик воситалари борлиги аниқланди.
Шунингдек, тезкор тадбир давом эттирилиб, мазкур ишга алоқадор бўлган Тошкент шаҳри ва вилоятида яшовчи, 1992, 1993, 1995 ҳамда 2000 йилларда туғилган 5 нафар фуқаро ҳам қўлга олинди.
Маълум бўлишича, улар Telegram орқали наркотик моддалар савдоси билан шуғулланувчи Россия фуқароси кўрсатмаларини бажариб келган.
“Навоий” чегара божхона постида фош этилган бошқа ҳолатда эса, 1980-й.т. Қирғизистон фуқароси томонидан аравакаш сифатида ёлланган шахс Қозоғистондан Ўзбекистонга газ плитасини олиб кирган вақтида тўхтатилиб текширилди.
Натижада газ плитаси ичида 1,985 кг “Алфа-ПВП” синтетик наркотик моддаси борлиги аниқланиб, процессуал тартибда расмийлаштириб олинди.
Шунингдек, тезкор тадбир давом эттирилиб, ушбу гиёҳвандлик воситасини қабул қилиб олган вақтида Тошкент шаҳрида яшовчи, 2006-й.т. шахс ашёвий далиллар билан ушланди.
Ҳозирда ҳар икки ҳолат юзасидан мазкур шахсларга нисбатан Жиноят кодексининг 246 (контрабанда) ва 273-моддалари (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят ишлари қўзғатилиб, тергов ҳаракатлари олиб борилмоқда.
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди. Май ойининг бошларида Сирдарё, Наманган ва Андижон вилоятларида қарийб 88 килограмм гиёҳвандлик моддаларни олаётган шахслар ушланганди.
Изоҳ (0)