Қирғизистоннинг қочқинликдаги собиқ президенти Қурманбек Бакиев амалдаги давлат раҳбари Садир Жапаровнинг ташаббуси билан Дубайда ўтказилган собиқ президентлар учрашувига фикр билдирди.
Унинг фикрича, Садир Жапаров қийин, аммо тўғри йўлни танлаган.
“Бу ташаббус унинг сиёсатчи сифатида етуклигини кўрсатади, у нафақат мамлакатимиз, балки бутун дунё учун хавфли вазиятда жамиятни бирлаштиришга уринмоқда. У барча масалада собиқ президентларни айблаб, танқид қилиб, популизм йўлини танлаши мумкин эди, лекин Жапаров тўғри йўлни танлади, гарчи бу осон бўлмаса-да. Бу унинг ҳам шахс сифатида, ҳам сиёсий жиҳатдан ўсганидан далолат беради”, — деди Бакиев.
Унга кўра, барча собиқ президентлар Жапаровнинг ташаббусини қўллаб-қувватлаган ва “шахсий келишмовчиликларни четга суриб, иш ҳақида ўйлашга” қарор қилган.
Қочқин президент, шунингдек, 2010 йил 7 апрелдаги одамларнинг ўлимида “унинг ҳеч қандай айби йўқлигини” айтди.
“2010 йил 7 апрелда Бишкекда ва июнь ойида жанубда қурбон бўлганларнинг ўлимига ким жавобгар эканини таҳлил қилишни истамайман, лекин бу менинг айбим эмас. Мен ушбу ва бошқа тегишли масалалар бўйича тергов ёки суд жараёнларида иштирок этишга тайёр эканлигимни бир неча бор айтганман”, — деди у.
Бакиев апрель воқеалари, унинг бошқарувига қарши чиққан намойишчиларнинг отиб ташланиши бўйича асосий айбланувчи ҳисобланади. У Қирғизистонда 30 йиллик қамоқ жазосига ҳукм қилинган. Аввалроқ Жапаров агар Бакиев Қирғизистонга келса, қамоққа олиниши кераклигини айтганди.
Эслатиб ўтамиз, Қирғизистоннинг амалдаги президенти Садир Жапаров 18 февраль куни Қирғизистоннинг барча президентларини бир жойга йиғиб, учрашув ўтказди. Унда Асқар Акаев, Қурманбек Бакиев, Роза Ўтунбоева, Алмазбек Атамбаев ва Сўронбай Жээнбеков иштирок этган. Жапаров собиқ президентлар ўз эътирозлари, аламларини билдиргани, шу билан бирга, хатоларини тан олиб, бир-бирини кечирганини айтганди. Атамбаев, Акаев ва Жээнбеков учрашувга ўз муносабатини билдирган.
Изоҳ (0)