Афғонистоннинг Ҳелманд провинциясида 15 август куни соқолини олганликда ва сочини турмаклаганликда айбланиб, ўнлаб дўкон эгалари ҳибсга олинди. Бу ҳақда Afghanistan International хабар берди.
Маълумотларга кўра, “Толибон” ҳаракати томонидан ҳибсга олинганларнинг баъзилари гаров эвазига қўйиб юборилган бўлса-да, айримлар ҳануз қамоқда қолмоқда. Мамлакатнинг Эзгулик вазирлиги аввалроқ барча провинцияларга юборган хатида “соқол қўйиш пайғамбар суннати” эканини эслатиб, уни бир муштдан қисқа қилиб олишни тақиқлаган эди. Шундан сўнг Ҳелмандда барча сартарошхона ва ҳаммомларга соқол олиш қатъиян ман этилгани ҳақида огоҳлантириш юборилган.
Бир сотувчининг айтишича, “одоб қўриқчилари” сўнгги кунларда дўконларни кезиб, соқоли калта бўлганларни рўйхатга олган ва “кейинги сафар ҳам шундай бўлса, шикоят қилишга ҳаққингиз йўқ” деб огоҳлантирган. Яна бир дўкончи эса укаси соқолини олгани учун қўлга олинганини айтиб, уни озод қилиш учун 3 соат давомида вазирлик идораси олдида кутганини, бироқ унинг кафилликсиз қўйиб юборилмаганини билдирган. Маҳаллий аҳолига кўра, “Толибон” вакиллари шаҳар бўйлаб барча дўконларни рўйхатга олиб, ҳафтасига 2 марта текширув ўтказмоқда. Соқоли олинган эркаклар аниқланса, дарҳол ҳибсга олинмоқда.
Инсон ҳуқуқлари ташкилотлари бу каби амалиётларни шахсий эркинликларни қўпол равишда бузиш сифатида баҳоламоқда. Human Rights Watch ва бошқа ташкилотлар “Толибон”нинг бундай сиёсати фуқароларнинг кундалик ҳаётига бевосита аралашув эканини, айниқса ёшлар ва тадбиркорлар эркинлигини кескин чеклашини таъкидлаган.
Эслатиб ўтамиз, бундан аввал ҳам “Толибон” Қандаҳор провинциясида соқолини олган ёки сочини турмаклаган кўплаб кишини ҳибсга олганди. Энди бу амалиёт Ҳелманд провинциясига ҳам ёйилди.
Изоҳ (0)