Qirg‘iziston Oliy sudi “qonundagi o‘g‘ri” Aziz Batukayevning noqonuniy ozod qilinishi bilan bog‘liq ish yuzasidan ikkita instansiya tomonidan chiqarilgan hukmlarni bekor qildi. Bu haqda Asia Plus xabar berdi.
Asosiy ayblanuvchisi Qirg‘izistonning sobiq prezidenti Almazbek Atambayev bo‘lgan ish Bishkek shahrining Birinchi may tumani sudiga qaytadan ko‘rib chiqish uchun jo‘natilgan. Atambayevga nisbatan 2020-yilning 23-may kuni yuqori nufuzga ega jinoyatchini ozod qilganlik uchun 11 yillik qamoq jazosi tayinlangan edi. Avgust oyida esa Bishkek shahar sudi hay’ati bu hukmni tasdiqlagan.
Ish bo‘yicha sobiq prezidentdan tashqari yana uchun jalb qilingan: shifokor Abduhalim Raimjonov, sobiq bosh prokuror Indira Joldubayeva va jazoni ijro etish davlat xizmati raisining sobiq maslahatchisi Kalibek Kachkinaliyev.
Sobiq maslahatchi hibsda saqlangani hisobidan ikki yilga ozodlikdan mahrum qilish jazosini olgan. Joldubayeva 5 million som (66,7 ming dollar) jarimaga tortilgan. Shifokor esa jinoyatning muddati o‘tganligi sababli jazodan qutulib qolgan.
2006-yilda “qonundagi o‘g‘ri” Aziz Batukayev Bishkek atrofidagi jazoni ijro etish muassasalaridan birida ommaviy tartibsizliklar uyushtirgani uchun 16 yilu 8 oy muddatga ozodlikdan mahrum qilingan. Tartibsizlik vaqtida deputat Tinichbek Akmatbayev, Jazoni ijro etish bosh boshqarmasi boshlig‘i Ikmatulla Po‘latov va ikki nafar parlament xodimi o‘ldirilgan.
2013-yilda Batukayev tibbiy komissiyaning unga qo‘yilgan so‘nggi darajadagi qon saratoni tashxisi asosida qamoqdan ozod qilingan. Shundan so‘ng u darhol mamlakatni tark etgan va o‘zining tarixiy vatani Chechenistonga ketgan. Ko‘p o‘tmay tibbiy hujjatlarning qalbaki ekanligi ma’lum bo‘ldi, biroq Qirg‘iziston rasmiylari Batukayevni orqaga qaytarishga muvaffaq bo‘lmagan.
Eslatib o‘tamiz, Almazbek Atambayev 2020-yilning iyun oyida 11 yillik qamoq jazosiga hukm qilingandi. U Qirg‘iziston Milliy xavfsizlik davlat qo‘mitasining tergov izolyatorida saqlanayotgan edi. Bishkekda 5-oktabrdan 6-oktabrga o‘tar kechasi yuz bergan tartibsizliklar chog‘ida Atambayev ozod qilindi. U 9-oktabr kuni Bishkekdagi namoyishlar bo‘layotgan markaziy maydonga chiqdi, 10-oktabr kuni esa tartibsizliklar tashkil qilish aybi bilan yana qo‘lga olingandi. Shundan so‘ng Atambayev Bishkekdagi 1-sonli tergov izolyatoriga joylashtirilgani va u yerda ochlik e’lon qilgani haqida xabar berilgandi.
Izoh (0)