Sony, Paramount, Warner Bros. каби йирик Голливуд студиялари YouTube платформасидаги сохта фильм трейлерлар билан курашишнинг янги усулини ўйлаб топди: уларни муаллифлик ҳуқуқи бузилгани учун ўчирмай, шунчаки қўшимча даромад манбаига айлантириб олди.
Deadline нашри олиб борган суриштирувларга кўра, кино саноати мазкур гигантлар эндиликда сохта трейлерларни YouTube’да блоклаш учун ариза юбормаяпти, балки уларнинг рекламадан келадиган даромадини ўзларига йўналтиришни талаб қиляпти. Журналистлар кўриб чиққан ёзишмалардан бирида Warner Bros. худди шундай талабни Screen Cultureе каналига қўйган ҳамда У “Аждаҳолар уйи” ва “Supermen” фильмларининг сохта трейлерларидан тушган монетизация пулларини ўзлаштириб олган.
Учала студия ҳам Deadline’га ушбу масалада изоҳ беришдан бош тортмоқда, актёрлар уюшмаси САG-АFTRА эса уларнинг бундай ҳаракатларини кескин танқид қилмоқда. Чунки кино саноати гигантлари муаллифлик ҳуқуқини ҳимоя қилиш ўрнига фейк видеоларни монетизация қилиши ажабланарли ҳолат. Ҳозирча бунга расмий жавоб берилмаса-да, сабаблар аниқ: бу пул ва бепул рекламадир.
YouTube сайти 2005 йилда, яъни, видео платформа пайдо бўлганидан буён сохта трейлерлар билан тўлиб кетган. Улардан энг биринчиларидан бири “Титаник” фильмига асосланган видео бўлиб, унда Леонардо Ди Каприонинг Жек образидаги қаҳрамони океанда муз бўлаги ичида пайдо бўлади ва Нью Йоркка қайтади. Бу кадрларнинг бари Селин Дионнинг Мy Heart Will Go On қўшиғи остида содир бўлади. 2018 йилда чиққан “янги” трейлер “Титаник 2: Жек қайтмоқда” деб номланиб, 53 миллиондан ортиқ кўрилган. Аммо видео 20th Century Fox талаби билан блокланган.
Ушбу видеоларни яратган фойдаланувчи VJ4rаwr2 ўзининг ҳақиқий исмини ошкор қилмаган, бироқ аллақачон “Концептуал трейлерларнинг отаси” сифатида тан олинган. У илк трейлерларни асосан кулги учун яратган бўлса, сўнгги йилларда сунъий интеллект бу жараёнга жиддий таъсир ўтказмоқда.
Шунга қарамай, ҳозирги сохта трейлерларнинг аксарияти ҳақиқатдан йироқ форматда, масалан: “Анна Тейлор Жой бош ролидаги “Музюрак” фильми қандай кўринишда бўлар эди?” ёки “Агар Леонардо Ди Каприо “Калмар ўйини” фильмида рол ижро этганида нима бўлар эди?”, “Генри Кевилл Жеймс Бонд ролида” каби фейк видеолар шунчалик машҳурки, улар ҳақида Variety ёки The Hollywood Reporter каби нуфузли вебсайтлар мақолалар ёзган.
Deadline маълумотларига кўра, айрим йирик каналлар сохта трейлерлардан миллионлаб доллар ишлаб топмоқда. Юқорида тилга олинган Screen Culture каналининг эгаси 27 ёшли Ниҳил Чаудхари асосан ҳақиқатан ҳам ишлаб чиқилаётган фильмлар учун трейлерлар тайёрлашга билан шуғулланади. У расмий видеолардан кадрлар, анъанавий монтаж усуллари ва сунъий интеллект воситаларидан фойдаланиб, миллионлаб томошабин эътиборини тортадиган видеоларни ишлаб чиқади.
Бугунги кунда Чаудхари жамоасида 12 та монтажчи ишлайди ва улар ҳар ҳафта 12 тагача янги видео чиқаради. Қизиғи шундаки, 2025 йил февраль ойида Screen Culture каналининг видеоси YouTube’да Marvel томонидан чиқарилган расмий “Фантастик тўртлик” трейлеридан ҳам кўпроқ томоша қилинган.
Screen Culture канали 1,4 миллиард кўришлар ва 1,4 миллион обуначига эга, аммо монетизация бўйича даъволар 2700 та видеонинг атиги 10 фоизига нисбатан талаб қилинган.
Изоҳ (0)