4 августдан 5 августга ўтар кечаси ХХ асрнинг машҳур актрисаси Мэрилин Монро вафот этади. Кўринишидан, у орзу қилиш мумкин бўлган ҳамма нарсага эга эди, лекин унинг ҳаётини бахтли деб бўлмасди. Жозибадор кўриниш, содиқ мухлислар ва оламшумул машҳурлик актрисанинг бахтли бўлишига ёрдам бера олмайди.
Оғир ўтган болалик
Мэрилин Монро 1926 йил 1 июнда Лос-Анжелесда туғилган. Соҳибжамол малласочнинг ҳақиқий исми — Норма Жан Мортенсон. Бўлажак юлдузнинг ота-онаси учун унинг туғилиши қувончли воқеа эмасди. Унинг онаси Гледис Перл Бейкер ҳомиладор бўлишидан олдин отаси билан ажрашган, шунинг учун у қизининг ҳужжатларида иккинчи эрининг исмини кўрсатган. Вояга етганида Монро бир неча бор ўз отаси билан боғланишга ҳаракат қилади, лекин отаси уни ҳаётига қўйишни хоҳламайди.
Бўлажак юлдузнинг болалиги оғир кечади: на онаси, на бувиси уни тарбиялашни хоҳламаган. Шунинг учун Мэрилин бошпаналарда яшаган ёки ҳомийлик остидаги оилаларда юрган. У ҳаётининг дастлабки етти йилини унинг вақтинчалик васийлари бўлган Альберт ва Ида Болендернинг уйида ўтказади. Шунга қарамай, Гледис вақти-вақти билан қизидан хабар олиб, уни пул билан таъминлаб туради. Бир куни аёл қизини олиб кетишга қарор қилади. Ўша вақтда онаси кичкина квартира сотиб олганди, энди улар бирга яшашлари мумкин эди.
Ўша пайтда Монронинг ҳаёти яхшилана бошлаганга ўхшарди, аммо тез орада Гледис руҳий касалликка чалинади. Унга шизофрения ташхиси қўйилиб, даволанишга юборилади. Мэрилин эса яна меҳрибонлик уйига қайтишга мажбур бўлади — у онасининг энг яқин дугонаси томонидан олиб кетилгунга қадар бир нечта оилада яшайди. Бироқ аёлнинг эри Мэрилинни бир неча бор зўрлашга урингач, бўлажак актриса холасиникига кўчиб ўтади. Албатта, бошдан кечирган барча синовлар ўз асоратини қолдиради — Мэрилин дудуқлана бошлайди ва бу нуқсонини бартараф этиш учун унга бир неча йил керак бўлади.
Кино оламига кириб келиши
Руҳий касаликка чалинмасдан олдин Мэрилин Монронинг онаси киностудияда монтажчи бўлиб ишлаган. Бироқ бўлажак актриса бутунлай бошқа соҳада ишлай бошлайди. 17 ёшида у Padioplane Co авиация заводига ишга киради. Ўшанда Монро моделлик карьераси айнан шу ерда бошланишини хаёлига ҳам келтира олмасди. Шундай қилиб, 1945 йилда унга бир қатор ташвиқот плакатларида суратга тушиш таклиф қилинади. Ҳарбий фотограф Дэвид Коновер қизнинг гўзаллигига эътибор қаратиб, уни суратга тушишга таклиф қилади. Мэрилин ўйлаб ҳам ўтирмай, корхонадаги ишини ташлаб, яхши даромад келтирадиган фотосессияларда қатнаша бошлайди. Худди шу йили у Blue Book моделлик агентлиги билан шартнома имзолайди.
Аста-секин Мэрилин Монронинг ташқи кўриниши ўзгара бошлайди. У карьера зинапоясида юқорига кўтарилиш учун жозибадор образга эга бўлиши кераклигини тушунади. Шундай қилиб, жигарранг сочли қиздан малласоч соҳибжамолга айланади. Айтганча, мос рангни топиш учун визажист актрисанинг сочларини 12 мартадан кўпроқ сариқ рангга бўяган. Бироқ натижа шунга арзийди.
Янги Мэрилин Монро эътиборни тортмай қолмайди. Бир куни 20th Century Fox студияси раҳбари Бен Лён уни кўриб қолади ва кастингга таклиф қилади. Актриса, албатта, бу таклифни қабул қилади. Бундан ташқари, у доимо актрисалик карьерасини орзу қилганди. Машҳур кинокомпания билан ҳамкорлик қила бошлагач, исмини таниқли тахаллусга — актриса Мэрилин Миллер шарафига ўзгартиради. У янги исмга онасининг қизлик фамилиясини қўшишга қарор қилади.
Узоқ кутилган омад
Аввалига Мэрилин Монрога эпизодик ролларни таклиф қилишади, лекин у вақтини беҳуда сарфламайди. Машҳур малласоч ўжарлик билан рақс ва вокал билан шуғулланади, шунингдек, бошқа актёрлар ижроларини томоша қилиб, уларнинг ҳаракатларини нусхалайди. Натижа узоқ кутилмайди: 1947 йилда юлдуз “Хордаги қизлар” мусиқий фильмидаги биринчи асосий ролини ўйнайди. Аммо бундан кейин бошқа таклифлар тушмайди ва 20th Century Fox студияси ҳамкорликни тўхтатади. Бироқ тез орада Монрога бошқа кинокомпания Columbia Pictures қизиқиб қолади.
1950 йилда Мэрилин “Асфалтли чангалзор” фильмида кичик рол ўйнайди. Кейин у “Тундаги тўқнашув”, “Тақиллатмасанг ҳам бўлади”, “Севги уяси”, “Қандай қилиб миллионерга турмушга чиқиш керак” каби фильмларда иштирок этади. Аммо ҳақиқий машҳурлик унга “Жентлеменларга малласочлар ёқади” лентаси чиққандан кейингина келади. Тез орада юқори даражадаги лойиҳалар, жумладан, “Жаззда фақат қизлар”, “Еттинчи кун қичимаси” ва бошқа кўплаб лойиҳаларда иштирок этади.
Кўпчилик унинг экрандаги образига ўрганиб қолган, шунинг учун улар актрисани бошқа ролда тасаввур эта олмасди. Бироқ Мэрилиннинг ўзи жиддийроқ ролларни кутаётган эди. Бунинг ажабланарли жойи йўқ, чунки Монронинг IQ даражаси 168 балл бўлган. У нафақат ўқишни, балки китоб йиғишни ҳам яхши кўрарди. Шунга қарамай, режиссёрлар унинг истакларини эътиборга олмай, ўз фикрларида қолишади.
“Голливуд бу — биргина ўпич учун 1 000 доллар, қалбингиз учун 50 сент тўланадиган жой”, — деб тан олган Мэрилин.
Монронинг шахсий ҳаёти
Аммо машҳур актрисанинг шахсий ҳаёти ҳавас қиларли эмасди. Мэрилин Монро биринчи марта қўшниси Жеймс Дагертига турмушга чиқади. Ўшанда актриса атиги 15 ёшда эди ва бу никоҳ етимхонага қайтмаслигига имкон берарди. Бироқ уларнинг никоҳи бир неча йил давом этади холос. Догерти хотинининг мақсадларини қўллаб-қувватламагач, Монро бошқа ҳаётни танлашга қарор қилади.
Мэрилиннинг иккинчи эри бейсболчи Жо Ди Мажио эди. Бироқ тўйдан 9 ой ўтгач, эр-хотин ажрашишади. Ажрашишнинг сабаби актрисанинг ҳаддан ташқари рашки эди. Ди Мажио ҳис-туйғуларини жиловлай олмайди ва хотинига қўл кўтара бошлайди. 1955 йилда Монро драматург Артур Миллер билан муносабатларни қонунийлаштиради. Севгилиси учун актриса яҳудийликни қабул қилади, аммо бу никоҳ ҳам унга бахт келтирмайди. Мэрилин она бўлишни орзу қилган, аммо унинг барча уринишлари ҳомила тушиши билан якунланган. Бу муаммоларнинг барчаси эндометриоз — актриса азоб чеккан гинекологик касаллик туфайли юзага келган.
Мэрилин Монро кўплаб таниқли эркаклар билан ишқий муносабатда бўлади. Миш-мишларга кўра, у АҚШ президенти Жон Кеннеди билан ҳам яқин бўлган. Улар яширинча учрашиб юришади, аммо 1962 йилда уларнинг муносабатларига ҳеч ким шубҳа қилмай қўяди. Ўшанда актриса сиёсатчининг 45 ёши нишонланган кечада Happy Birthday, Mr. President қўшиғини куйлайди.
Соғлиғи билан боғлиқ муаммолари ва сирли ўлими
Фарзандли бўлолмагани ва шахсий ҳаётидаги муваффақиятсизликлар нафақат Мэрилин Монро ҳаётида чуқур из қолдиради, балки руҳий муаммоларни ҳам келтириб чиқаради. Бу воқеаларнинг барчаси актрисанинг спиртли ичимликлар ва ноқонуний моддаларни истеъмол қилишга олиб келади. Бундан ташқари, Голливуд юлдузи дозани ошириб юборганидан кейин бир неча бор касалхонага ётқизилган. У, шунингдек, кучли дориларни ҳам қабул қилганди.
“Биз унинг маникал-депрессив психоз касаллиги борлигини билардик, ҳозирда у биполяр деб аталади”, — дейди актрисанинг даволовчи шифокори Ҳайман Энгельберг.
Монро руҳий саломатлиги билан боғлиқ муаммоларни енгиш учун курашади. Мэрилин ҳафтасига беш марта психиатр суҳбатига ташриф буюради, аммо яна бир асабий тушкунликдан сўнг уни Пейн Уитни психиатрия клиникасига ётқизишади.
Актрисанинг ишлаши тобора қийинлашади. У сценарийдаги сўзларини эслай олмасди, шунинг учун бир саҳнани бир неча марта суратга олишга тўғри келади. Бундан ташқари, ўша пайтда Мэрилин қаттиқ депрессияни бошдан кечиради. Буларнинг барчаси аянчли оқибатларга олиб келади.
1962 йил 4 августдан 5 августга ўтар кечаси Монро ўз ётоқхонасида қўлида телефон гўшаги билан ўлик ҳолда топилади. Экспертизга кўра, унинг ўлимига барбитуратнинг ортиқча дозаси сабаб бўлгани аниқланади. Бироқ ўз жонига қасд қилишнинг аниқ сабаблари ҳозиргача номаълум. Фитна назариётчилари Мэрилинни ўлдиришган деб ҳисоблашади. Бир версияга кўра, Кеннедилар оиласи улар ўртасидаги муносабатларни яширишни истаган. Бошқалар эса малласоч FBI ёки Марказий разведка бошқармаси буйруғи билан ўлдирилганига амин. Зўравонлик излари топилмаган бўлса-да, Мэрилин Монронинг ўлими сабаби ҳалигача ошкор этилмаган.
Изоҳ (0)