Фильмда рол ўйнашни хоҳламаган, лекин мажбур қилинган Голливуд актёрлари

Мазкур актёрлар турли сабабларга кўра баъзи фильмларда мажбуран иштирок этган.

Даниэль Крейг — “007: Спектр”

Дастлаб Даниэль Крейг “Роял казиноси” фильмида Жеймс Бонд ролини ижро этишга рози бўлишни истамаган. Бироқ Даниэль барибир Бондиана қисмига айланди ва учта фильмда суратга тушди. Крейг “007: Спектр” номли тўртинчи қисмда қатнашишни хоҳламаган бўлса-да, шартнома мажбуриятлари туфайли унда ўйнашга мажбур бўлди. Шундан сўнг Крейг энди ҳеч қачон Жеймс Бонд ролини ижро этмаслигини ва бундан кўра ўзини ўлдиришни афзал кўришини айтди. Даниэль, шунингдек, агар яна Бонд ролини ўйнайдиган бўлса, буни фақат пул учун қилишини тан олди. 6 йилдан кейин эса Крейг ижросидаги Жеймс Бонд қиссасини тўлиқ якунлаган “Ўлиш вақти эмас” фильми экранларга чиқди.

Вупи Голдберг — “Теодор Рекс”

90 йиллар бошида Вупи Голдберг “Ҳаракат қил, синглим” ва “Руҳ” каби фильмларда рол ўйнаб, “Бинафшаранг гулзор” ва “Сакровчи Жек” фильмларидан кейин эришган муваффақиятини янада мустаҳкамлади. Вупи ниҳоятда машҳур актрисага айланди, New Line Cinema студияси эса унга ҳали на сюжети, на режиссёри, на бошқа бирор нарсаси бўлган фильмда рол ўйнаши учун беш миллион доллар тўлашга тайёр эди. Вупи таклифни қабул қилди, беш миллионни олди ва бир муддат ўтгач, қандай фильмда суратга тушиши кераклигини билди.

Голдберг “Теодор Рекс” сценарийсини ўқигач, фильмда қатнашишдан бош тортди ва ўша беш миллионни қайтармоқчи бўлди. Шу пайт студия шартномани бузгани учун унга қарши йигирма миллион долларлик даъво қўзғатишга тайёрлигини маълум қилди. Вупи бундай катта суммани тўлолмасди. Шу боис у таклифни қабул қилишга мажбур бўлади ва 90 йилларнинг энг ёмон фильмларидан бирида рол ижро этди.

Натали Портман — “Тор 2: зулмат салтанати”

Натали Портман “Леон”, “Қора оққуш”, “Биродарлар” ва “Вендетта” каби машҳур фильмларда рол ўйнагани сабабли унинг  “Тор” суперқаҳрамонлар фильмида қатнашишга рози бўлгани томошабинларни ҳайратга солди. Натали учун бу яхши тажриба бўлган бўлса-да, уни такрорлашни унчалик истамасди. Шу боис “Тор 2: зулмат салтанати” фильмидаги ролини такрорлашга фақат фильмни аёл режиссёр Петти Женкинс суратга олишини билганидан кейингина рози бўлди. Бироқ Натали шартнома имзолаганидан сўнг, Петти кутилмаганда ишдан бўшатилди ва унинг ўрнига Алан Тейлор тайинланди.

Портман дарҳол фильмни тарк этишга уринди, аммо аввалроқ тузилган шартнома туфайли қолишга мажбур бўлди. “Тор 2: зулмат салтанати” ўша пайтда Marvel’нинг энг омадсиз фильмларидан бирига айланди, шунинг учун “Леон” юлдузи учун бу фильмда иштирок этиш пулдан бошқа ҳеч қандай ижобий натижа келтирмади. Тўққиз йил ўтгач, Натали яна бир бор “Тор” фильмида рол ўйнади, бироқ бу сафар унинг роли анча кенгайтирилди — илгари Жейн Фостер иккинчи даражали қаҳрамон ва “бош қаҳрамоннинг севгилиси” бўлган бўлса, “Тор: муҳаббат ва момақалдироқ” фильмида у ўзи суперқаҳрамонга айланди ва қўлига болға олди.

Женнифер Гарнер — “Электра”

Женнифер Гарнер “Перл Ҳарбор” фильми ва “Жосус” сериалида рол ўйнаган таниқли актриса эди. У “Қўрқмас” ва “Электра” фильмлари учун шартнома имзолайди. “Қўрқмас” 2003 йилда экранларга чиқди, аммо кутилган натижаларни бермади: 78 миллион долларлик бюджет билан атиги 179 миллион доллар ишлаб топди. Эътиборли томони шундаки, бундай кўрсаткичлар студияни умуман ташвишга солмади. Аксинча, улар вазиятдан фойдаланиб, Женнифер Гарнерни “Жосус” сериалидан олиб, “Электра” фильмида рол ўйнашга мажбур қилишди. Актрисанинг бунга ҳеч қандай истаги йўқ эди, бироқ у “йўқ” деёлмасди. Натижада фильм прокатда муваффақиятсизликка учради ва “Қўрқмас”нинг давоми бутунлай йўққа чиқди.

Ченнинг Татум — “Илон ҳамласи”

Ёш ва истиқболли актёрлар кўпинча студиялар билан бир нечта фильмга шартнома тузишади, аммо кейинчалик бундан афсусланишади, чунки бундай келишувлар уларнинг кинодаги танловини чеклайди. “Мураббий Картер” фильмидан сўнг Paramount студияси билан учта фильмга шартнома имзолаган Ченнинг Татум ҳам шундай вазиятга дуч келди. Бироқ студия у билан фақат тўрт йилдан кейин “Илон ҳамласи” фильми ишлаб чиқарилишни бошлаганда боғланди. Ўша пайтга келиб Ченнинг “Олдинга қадам”, “Қоидаларсиз жанг” ва “Жонни Д.” фильмларида суратга тушишга улгурган, шунингдек, карьерасини давом эттиришга тайёр эди. Аммо эски шартнома унинг режаларини бузди. У тузоққа тушганини ва ҳаётидан уч йилни оладиган учта ишга боғланишга мажбур бўлганини тушунди. Уларнинг ҳеч бири “Мураббий Картер” даражасида бўлиши аниқ эмасди.

Бред Питт — “Троя”

Карьерасининг чўққисида Бред Питт Warner Bros студияси билан шартнома имзолаган бўлса-да, бир сафар мажбуриятларини бажармай, ноилож “Троя” фильмининг асосий актёрлар таркибига қўшилишга мажбур бўлди. Бу иш машҳур актёрнинг сараланган фильмографиясига кирса-да, унинг ўзи бу фильмни ёқтирмайди. Унингча, “Троя” тарихида ҳеч қандай жумбоқ ёки қизиқарли сюжет бурилишлари йўқ эди. Бунинг устига, доим кадр марказида бўлиш унга завқ бермай қўйганди. Шунга қарамай, Питт “Троя”дан миннатдор эканлигини тан олади.

Эмили Блант — “Гулливернинг саёҳатлари”

Эмили Блант “Қаттиққўл хоним” фильмида ўйнагач, унинг карьераси юксалиб, бир йилда уч-тўртта фильмда суратга туша бошлади. Муваффақият чўққисида Эмили “Гулливернинг саёҳатлари” лойиҳасига розилик берди, аммо кўп ўтмай бу қароридан афсусланди. Чунки тез орада унга “Темир одам 2” фильмида Наташа Романофф ролини ўйнаш таклиф этилди. Шу ондаёқ “Гулливернинг саёҳатлари” Блант учун ўзини кўрсатиш имконияти эмас, балки катта франшизага йўл очишга тўсиқ бўлиб қолди. Эмили “Гулливернинг саёҳатлари”дан воз кечишга тайёр эди, бироқ бунинг иложи бўлмади ва Наташа роли Скарлетт Йоханссонга насиб этди. Кейинчалик актриса Роб Леттерман фильмидаги иштирокидан афсусланганини бир неча бор таъкидлади, аммо “Темир одам 2”да суратга туша олмаганидан кўпроқ ачинишини айтди.