Кўпчилик тонал кремсиз уйдан чиқиш деярли жасорат деб ҳисоблайди. Аслида эса тери қалин қопламаларсиз ҳам тетик ва чиройли кўриниши мумкин. Қуйидаги содда усуллар юзга тезда порлоқлик беришга ёрдам беради. Бу осон, тез ва ортиқча уринишларсиз. Сизга керак бўладигани бир оз вақт ва бир нечта универсал гўзаллик воситалари.
Совуқ патчилар ва муз: бедор тунлардан кейин тез ёрдам
Агар сиз кечаси ухламаган бўлсангиз, SOS-восита сифатида муз кубиклари ёрдам беради. Муз қон айланишини фаоллаштиради, шишларни камайтиради ва юзга соғлом ранг беради. Муҳими муз кубигини бир жойда узоқ ушлаб турмаслик, балки уни юз бўйлаб массаж чизиқлари бўйича (юз марказидан четга томон) юритиш керак.
Голливуд косметологи Олег Ҳенриксен сув ўрнига севимли тоникни музлатишни тавсия қилади. Сўнг муз бўлакларини юпқа оқ пахта рўмолчага ўраб, юз бўйлаб аста-секин суртиш керак. Кейин эса коллагенли серум ва озиқлантирувчи крем суртиш керак.
“Мен бу усулни табиий ботокс деб атайман. Агар доимий қилсангиз, бу қаришга қарши мукаммал восита бўлади”, дейди Ҳенриксен.
Лекин музни жуда қуруқ тери, купероз (қон томирлари муаммоси) ёки яралар мавжуд бўлса ишлатиш тавсия этилмайди. Бундай ҳолларда альтернатив сифатида патчилар (кўз ости ниқоблари) яхши танлов бўлади. Масалан, пантенол ва ёғлар терини тиклайди ва мустаҳкамлайди, пептидлар уни таранг қилади, алоэ ва мойчечак экстракти эса яллиғланишни камайтиради.
Праймер ва порловчи крем: тонал кремсиз ҳам терининг ялтираши
Праймер ҳар қандай аёлнинг косметик сумкасидаги ёрдамчи восита. Унинг вазифаси макияжни узоқ сақлаб туриш. У тонал крем учун асос бўлса ҳам, алоҳида ҳолда ҳам ишлатилади. Рангсиз праймер юзни маттлаштиради ва тешикларни яширади. Энг яхши эффект учун сув ёки ёғ асосидаги праймерни танланг. Шунингдек, бу терига порловчи эффект беради ва уни “нафас олишга” имкон беради.
Юзга порлоқлик бериш учун махсус крем ёки қуёшдан ҳимоя қилувчи спрейлардан ҳам фойдаланиш мумкин. Улар қиммат бўлиши шарт эмас. Масалан, Женнифер Лопез 11 долларлик спрейдан фойдаланади, актриса Эмма Стоун эса узум ёнғоғи ёғини афзал кўради. У айнан шу ёғ терисини порлаб туришига ёрдам беришини айтади.
Кремли румяна ва тинт: ёноқларда тетиклик эффекти
Румяна юзга тетиклик беради ва ранг қўшади, шу билан бирга қизаришларни ҳам яшира олади. Макияж қоидаларига кўра, сарғиш аёллар учун оч пушти, қорачадан келган аёллар учун эса шафтоли ва беж ранглар мос. Айнан кремли румяна эса намланган, соғлом тери эффектини беради. Агар тери қуруқ бўлса, уни тинт билан алмаштириш мумкин.
Румяна ва тинтни суртиш учун ягона “тўғри” усул йўқ. “Ёноқдаги олма” усули ҳамма учун тўғри келавермайди, чунки юз тузилмалари ҳар хил.
- Тавсия этилган техникалар:
• думалоқ юз: диагоналда, ёноқ суяклари бўйлаб;
• чўзилган юз: горизонтал, чаккаларга чиқмасдан;
• тўртбурчак юз: ёноқдаги “олма” усули билан юмалоқ суриш.
Суриш учун чўтка (айланма ҳаракатлар билан) ёки бармоқ (уриб суриш ҳаракати билан) ишлатиш мумкин.
Силлиқ қошлар: ортиқча урғусиз йиғилган образ
Яхши таралган ва силлиқ қошлар образни йиғилган, юзни эса тетик қилади. Бу эффектга эришиш учун сизга фақат чўткача ва бир томчи гел керак бўлади. Лекин гелни ҳаддан ташқари кўп ишлатишдан эҳтиёт бўлинг: агар ортиқча бўлса, қош толалари хира кулранг қатлам билан қопланади.
Қошга кучли урғу берманг. Уларни кўп бўёқ билан тўлдириш ёки рангли гел билан шакл бериш ташқи кўринишни оғирлаштиради ва ажинларни кўпроқ кўрсатади. Бунинг ўрнига, урғуни очиқ, ёрқин лаб бўёқлари ёки нам кремли румянага қаратинг. Бу майда ажинларга эътиборни камайтиради ва терини ялтиратади, дейди қош бўйича мутахассис Шавата Сингҳ
Ҳайлайтер — тетик нигоҳ сири
Агар юзни тезда янгилаш керак бўлса, ҳайлайтер сизнинг энг яқин дўстингиздир. Сувли (суюқ) ҳайлайтердан томчи олиб, уни кўзнинг ички бурчакларига суртинг — бу кўзни очиқроқ ва дам олган кўринишга келтиради. Яна бир оз ҳайлайтерни қош учларига, ёноқларга ёки юқори лаб устидаги “Купидон белгисига” (юрак шаклидаги эгри чизиқ) суртиш мумкин. Муҳими яхшилаб тарқатинг, акс ҳолда ялтираб турган доғлар пайдо бўлиши мумкин. Агар кўпроқ ялтирашини истасангиз, қўшимча қатлам суртишингиз мумкин.
Бу усуллар сизга юзингизга тетиклик бахш этишда ёрдам беради, ҳаттоки тонал кремсиз ҳам. Аммо шуни унутмангки, юзга энг яхши нур ва соғлом кўриниш бу уйқу, тўғри овқатланиш ва тоза ҳаводан келади. Бу учлик энг яхши тинт, румяна ва праймердан ҳам кучлироқ таъсирга эга. Шунчаки синаб кўринг.
Изоҳ (0)