Ўртоқ Сааховнинг шляпаси, Жек Николсоннинг болтаси: аукционда рекорд нархга сотилган машҳур фильмлар реквизитлари

Ҳар бир шедевр фильм ортида нафақат истеъдодли актёрлар ва даҳо режиссёрлар, балки суратга олиш майдончасидаги реквизитлар ҳам туради. Қуйида машҳур кинофильмлардан олинган ва катта пулга сотилган буюмлар билан танишинг.

Ўртоқ Сааховнинг шляпаси кимошди савдосидаги машҳурлик онини 37 йил кутди

Кўпчилик севиб томоша қиладиган “Кавказ асираси” комедиясидаги машҳур “Шляпани еч!” ибораси эсингиздами? Владимир Этуш маҳорат билан ижро этган ўртоқ Сааховнинг ёрқин образига хос бўлган бу бош кийим кино экранидан ташқарида ҳам машҳур бўлди.

2003 йил декабрь ойида Москвада нафақага чиққан актёрлар фойдасига хайрия кимошди савдоси ўтказилади. Бу тадбирда мазкур шляпа энг қимматбаҳо лотлардан бирига айланади. Владимир Этуш 1966 йилда суратга олинган фильмнинг бу реквизитидан ажралишни истамаган, аммо охир-оқибат уни сотувга қўйишга қарор қилади. Шляпанинг бошланғич нархи атиги 50 доллар эди, бироқ савдо жараёнида унинг нархи 3600 долларгача кўтарилади.

Мерилин Монронинг оқ кўйлаги: ўзгаришлар шамоли эсганда

“Еттинчи йил иситмаси” фильмидаги Мерилин Монронинг афсонавий оқ кўйлаги нафақат Голливуд жозибадорлигининг, балки рекорд даражадаги аукцион савдоларининг рамзига айланди. 2011 йилда бу машҳур либос ақл бовар қилмас 4,6 миллион долларга сотилади.

Қизиғи, Мерилиннинг эри, бейсболчи Жо ДиМажио бу кўйлакни ёмон кўрар ва ўша саҳнадан ғоят ғазабланган эди. Суратга олишдан уч ҳафта ўтгач, газеталар уларнинг ажрашгани ҳақида хабар тарқатади.

“Титаник”дан олинган эшик: Жекни қутқаролмаган ёғоч панел

“Титаник” фильмидаги машҳур ёғоч панел ниҳоят янги эгасини топди. 2024 йилнинг март ойида ушбу машҳур реквизит Heritage Ауcтионс кимошди савдосида 718 750 АҚШ долларига сотилди.

Савдо 60 000 доллардан бошланди, аммо атиги олти дақиқада нарх 700 000 долларга чиқди. Ҳамма “эшик” деб атайдиган бу панел, аслида кема салонидаги эшик ромининг бир қисми экан. У 1912 йилда чўкиб кетган “Титаник”нинг ҳақиқий парчаси асосида балза ёғочидан ясалган.

“Ёғду”даги болта: мухлислар тунги даҳшатли тушлар учун бутун мол-мулкини беришга тайёр

“Ёғду”даги энг қўрқинчли саҳна — Жек Николсоннинг эшикни бузиб кириб, “Мана, Жонни ҳам келди!” деб қичқириши бўлса керак. Стенли Кубрикнинг машҳур фильмидаги ўша болта 2019 йилги кимошди савдосида 209 минг долларга сотилди.

“Келажакка қайтиб” фильмидаги DeLorean: ярим миллион долларлик вақт машинаси

Юқорига қаноцимон очиладиган эшиклари ва зангламайдиган пўлат корпуси билан машҳур бўлган DeLorean ДМC-12 автомобили 2011 йил декабрь ойидаги кимошди савдосининг чинакам юлдузига айланди. Марти МакФлай ва доктор Эммет Браун саёҳат қилган бу автомобиль 541 200 долларга сотилди.

Ушбу нусха трилогия учун яратилган еттита DeLoreanъдан бири бўлиб, уларнинг фақат учтаси суратга олиш жараёнидан омон қолган. Сотилган автомобиль франшизанинг учинчи қисмида, Марти 1885 йилда Докни қидириш учун сафарга чиққан саҳнада ишлатилган. Суратга олиш ишлари якунлангач, машина 14 йил давомида Universal Studios ҳовлисида қолиб кетади ва кейинчалик Лос-Анжелесдаги Петерсон музейида қисқа муддат намойиш этилади.

Сотувдан тушган маблағнинг бир қисми Майкл Ж. Фокснинг Паркинсон касаллигини ўрганиш жамғармасига йўналтирилади — Марти ролини ижро этган актёр 1991 йилдан бери ушбу дардга чалинган.

Одри Ҳепберннинг кичкина қора кўйлаги: миллион долларлик нафосат тимсоли

“Тиффанидаги нонушта” фильмидаги Одри Ҳепберннинг машҳур қора либоси 2006 йил декабрда Чристиэъс кимошди савдосида рекорд даражадаги 467 200 фунт стерлингга (тахминан 923 187 доллар) сотилди. Ҳеч ким бундай шов-шувни кутмаганди — дастлабки баҳо атиги 50-70 минг фунт стерлингни ташкил этганди.

1961 йилда афсонавий Юбер де Живанши томонидан яратилган енгсиз нафис кўйлак нозик дид рамзи сифатида тан олинди. Фильмнинг машҳур бошланиш саҳнасида Холли Голайтли (Ҳепберн) эрта тонгда қўлида қаҳва ва круассан билан таксидан тушиб, бўм-бўш Бешинчи шоҳ кўчасига чиқади ва заргарлик дўкони витринасига мафтун бўлиб тикилиб қолади.

Кимошди савдоси ортидаги таъсирли воқеа шуки, Живанши модалар уйи Калкуттадаги камбағал болаларга ёрдам берувчи Cитй оф Жой Аид хайрия ташкилоти учун маблағ йиғиш мақсадида ушбу кўйлакни совға қилган.

Доротининг ёқут туфлилари: сеҳрли воқеа, ўғрилик ва рекорд нарх

“Оз мамлакати сеҳргари” фильмидаги Доротининг ялтироқ ёқут туфлилари кимошди савдоси дунёсида ҳақиқий шов-шувга сабаб бўлди. 2024 йил декабрь ойида ушбу машҳур пойабзалнинг сақланиб қолган тўрт жуфтидан бири ақл бовар қилмас 28 миллион АҚШ долларига сотилди.

Бу туфлининг тарихи алоҳида фильмга арзигуликдир. 1939 йилда 16 ёшли Жуди Гарланд учун яратилган туфлининг ҳар бири 2300 та ялтироқ мунчоқ билан қўлда безатилган. Қизиғи шундаки, китобда туфли кумушрангда тасвирланган, аммо фильмда улар ёқут рангида кўрсатилган. Бунинг сабаби янги Technicolor рангли форматида сариқ ғиштли йўл фонида янада чиройли кўриниш бериш эди.

2005 йилда мазкур туфли Миннесотадаги Жуди Гарленд музейидан ўғирланган ва 13 йилдан кейин 2018 йилда ФҚБ томонидан топилган. Ажабланарлиси, ўғри уларни ҳақиқий ёқутлар билан безатилган деб ўйлаган.

Heritage аукцион уйи туфлиларнинг нархи тахминан 3 миллион доллар атрофида бўлишини тахмин қилганди, аммо 15 дақиқалик қизғин савдодан сўнг, Доротини уйга олиб борган сеҳрли туфлилар кино реквизитлари орасида мутлақ рекорд ўрнатди.