2015 йилда актёр Жонни Депп билан турмуш қурган, аммо бир йил ўтиб, катта можаролар билан ажрашган Эмбер Ҳёрд яна бир бор она бўлди: актриса эгизак фарзандларни дунёга келтирди.
“Аквамен” юлдузи 2025 йил халқаро Оналар кунида ушбу қувончли хабар билан ижтимоий тармоқларда бўлишди. У қизига Агнес ва ўғлига Оушен деб исм қўйди. Эндиликда 38 ёшли актрисанинг уч нафар фарзанди бор.
Эмбер эгизакларининг туғилгани ҳақида шахсий блогида ҳам хабар берди. Унда актриса янги туғилган эгизаклар ва катта қизи Уна билан тушган ажойиб суратни эълон қилди. Фото остида у ўзининг ҳаётидаги энг бахтли дамлардан бирини бошдан кечираётганини ёзиб қолдирди:
“2025 йилги Оналар куни мен учун унутилмас бўлиб қолади. Бу йили бахтдан тўлиб кетдим ва орзу қилган оиламни ниҳоят тўлиқ қура олдим. Бугун қувонч билан хабар бераман: Ҳёрдлар оиласига эгизаклар келди. Қизим Агнес ва ўғлим Оушен қўлларимни ҳам, юрагимни ҳам тўлқинлантириб юборди. Тўрт йил олдин биринчи қизим Уна туғилганида ҳаётим бутунлай ўзгарганди. Ўшанда бундан бахтлироқ бўлишни тасаввур қила олмаган эдим. Аммо энди уч карра бахтлиман!
Она бўлиш қарорини ўзим, шароитларга ва бепуштлик муаммоларига қарамай қабул қилишим — ҳаётимдаги энг муҳим ва энг нозик тажриба бўлди. Бу танловни онгли ва тўлиқ масъулият билан амалга ошира олганим учун фалакдан чексиз миннатдорман. Қаерда бўлишингиздан қатъи назар, қандай йўлдан ўтган бўлсангиз ҳам, сиз азиз оналар билан бирга бу кунни нишонлаймиз”.
Ҳёрд фарзандларининг отаси кимлиги аввалгидек сир тутилмоқда. Шунингдек, у болаларни ўзи дунёга келтирдими ёки тўнғич қизи Уна каби яна суррогат она хизматига мурожаат қилдими, бу ҳақда ҳам аниқлик киритилмаган. Актрисанинг ўзи эса ҳозирча тафсилотларни изоҳламади.
Маълумот учун, Эмбер Ҳёрднинг тўнғич фарзанди Уна Пейж 2021 йил 8 апрелда туғилган. Аммо актриса бу ҳақда оммага фақат уч ой ўтиб маълум қилган. Актёр Жонни Депп билан шов-шувли ажримдан сўнг актриса ҳаёт тарзини тубдан ўзгартирди: у АҚШдан кўчиб кетди ва Испанияда яшай бошлади. У ерда шахсий ҳаётидан завқланиб, Голливуд шовқинидан узоқда қолди. Ҳозирда Эмбер бутун эътиборини оналик бурчига қаратган ва шахсий ҳаётини оммадан йироқда сақлашга ҳаракат қилмоқда.
Изоҳ (0)