Improvizatsiya va komedik shoular ko‘pincha bo‘lajak kinoyulduzlar uchun dastlabki maydoncha vazifasini o‘taydi. Ba’zi stendap ijrochilarining aktyorlik san’atiga o‘tishi shunchalik tabiiy bo‘lganki, ular bir paytlar kichik klublarda qo‘llarida mikrofon bilan chiqish qilganiga ishonish qiyin.
Jim Kerri
Aktyor o‘smir paytidanoq Toronto klublarida chiqishlar qila boshlagan. U yerda kanadalik yigitni mashhur komediyachi Rodni Deynjerfild payqab qolib, uni o‘z turnelariga sahnani “qizdiruvchi” sifatida taklif etgan. Ko‘p o‘tmay Jim Kerri Los Anjelesga ko‘chib o‘tib, mahalliy stendap sahnalarining doimiy ishtirokchisiga aylanadi, mashhurlarni parodiya qilib, tomoshabinlarni hayratga soladi.
Shu davrda Kerri tungi tok-shoularda ham tez-tez ko‘rina boshlaydi. Xarizma va energiyasi tufayli Jim tez orada “Yorqin ranglarda” ko‘rsatuvida, keyinchalik “Shanba kechasidagi jonli efir” kult serialida chiqadi.
Jim kinoda o‘zini ilgari ham sinab ko‘rgan bo‘lsa-da, haqiqiy muvaffaqiyat 1994-yilda keladi. O‘shanda “Eys Ventura: uy hayvonlarini qidirib” filmi ekranlarga chiqadi, undan keyin esa “Niqob” filmi suratga olinadi. “Truman shousi” tragikomediyasi esa uning dramatik aktyor sifatidagi faoliyatiga burilish yasaydi — Kerri bu roli uchun “Oltin globus” mukofotiga sazovor bo‘ladi.
Emma Tompson
Ikki marta “Oskar” va “Oltin globus” mukofotlari sohibasi ham kinoga stendap komediyasi orqali kelgan. Emma Tompson Kembrijda o‘qiyotgan paytidayoq Footlights komediya truppasiga a’zo bo‘lib, Stiven Fray va Hyu Lori bilan do‘stlashgan. Bitiruvdan so‘ng, bu iste’dodli uchlik “Alfresko” nomli sketch-shouda birlashgan.
Hajviy ko‘rsatuvlar va stendap chiqishlarda ishtirok etishni davom ettirgan holda, britaniyalik aktrisa kinoga ilk qadamlarini qo‘ygan. Tompsonning karyerasi 1992-yilning asosiy mukofotlarini qo‘lga kiritgan “Hovards End” melodramasidagi roli bilan yangi bosqichga ko‘tariladi. 1996-yilda esa Emma Jeyn Ostinnning sevimli “Aql va tuyg‘u” romanini ekranlashtirganlik uchun ssenariy muallifi sifatida “Oskar” mukofotiga sazovor bo‘ladi.
Jeyson Sudeykis
Amerikalik aktyor karyerasi o‘zi tug‘ilib o‘sgan Virjiniyada boshlangan. Keyinchalik Jeyson Sudeykis Chikagoga ko‘chib o‘tib, u yerdagi afsonaviy The Second City truppasiga qo‘shiladi va tez orada “J.T.S. Brown” nomli ko‘ngilochar dasturini yo‘lga qo‘yadi. 2003-yilda Sudeykis “Shanba kechasidagi jonli efir” ko‘rsatuvining ssenariy mualliflari jamoasiga qabul qilinadi, ko‘p o‘tmay esa sketchlarda ham ko‘rina boshlaydi. 2005-yilga kelib Jeyson ko‘rsatuvning asosiy aktyorlari safiga qo‘shiladi.
Sudeykis kinoda ham o‘zini sinab ko‘radi — dastlab “Vegasda bir kecha” va “Kallakesar” filmlarida ikkinchi darajali rollarda qatnashadi. Aktyorning nomi “Yomon boshliqlar” va “Biz Millerlar” komediyalaridan so‘ng yanada mashhur bo‘ladi. O‘sha paytga kelib, tomoshabinlar Jeysonni yaxshi tanib, uni sevib qolishgandi. Uning karyerasining cho‘qqisi sifatida “Ted Lasso” serialini ko‘rsatish mumkin, bu serial unga ikkita “Oltin globus” va “Emmi” mukofotlarini olib keladi.
Vupi Goldberg
Bu yulduz o‘z yutuqlari tufayli nufuzli EGOT klubiga kiradi. Biroq Vupi Goldberg karyerasidagi dastlabki jiddiy qadamlarni “The Spook Show” nomli komediya monospektakli bilan qo‘ygan. Uning yorqin chiqishi “Virjiniya Vulfdan kim qo‘rqadi?” va “Yaqinlik” filmlari bilan mashhur bo‘lgan rejissyor Mayk Nikolsning e’tiborini tortadi. 1984-yilda rejissyor yosh aktrisaga loyihani Brodveyga olib chiqishga ko‘maklashadi va uning premyerasi g‘oyat katta muvaffaqiyat qozonadi. Bir yil o‘tar-o‘tmas, Vupi Stiven Spilbergning “Binafsharang gullar” dramasida bosh rolni qo‘lga kiritadi.
Muvaffaqiyatli debyutiga qaramay, Goldberg hazil-mutoyiba filmlarida suratga tushishni va stendap chiqishlarini davom ettiradi. 1989-yilda aktrisa Jeyms Belushi bilan birga Andrey Konchalovskiyning “Gomer va Eddi” filmida rol ijro etadi. “Ruh” filmidagi rolini esa Vupining stendap chiqishlarini sevib tomosha qiladigan Patrik Sueyzi tufayli qo‘lga kiritadi.
Izoh (0)