Ҳар биримиз камида бир марта кечқурун уйга фақатгина енгил ва кулгили бирор фильмни томоша қилиш истаги билан келганмиз. Айнан шу мақсадга комедиялар жуда мос келади. Қуйида сиз учун вақт синовидан ўтган енгил комедиялар ҳақида маълумотлар келтирилади.
“Ғаройиб полициячилар”
Николас Эйнжел (Саймон Пегг) — Лондоннинг бош полицияси ходими. Николас ўз ишида шунчалик бенуқсонки, раҳбарият уни пойтахтдан узоқроққа юборишга қарор қилади... Шундай қилиб, у Сендфорд номли кичик шаҳарчага боради. Бундан ташқари, унга Дэнни Баттерман (Ник Фрост) исмли шерик тайинланади. Дэнни хулқ-атвор бўйича Николаснинг тўлиқ қарама-қарши варианти бўлиб, у ҳақиқий таъқиблар ва отишмаларни орзу қиладиган йигит.
Дастлаб, Сендфордда нафақат шерик, балки Эйнжелнинг ўзи ҳам керак эмасдек туюлади. Бу ерда жиноятчилар ўрилмаган газон ва оққуш ўғирланиши билан чекланади. Бироқ кўп ўтмай, шаҳарчада бир қатор шафқатсиз қотилликлар содир бўлади. Бу жиноятларни тергов қилиш янги жамоага топширилади.
“Ғаройиб полициячилар” — қувноқ кулгили қаҳрамонлар Пегг ва Фрост билан полиция жанговар фильмлар пародияси. Суяк-суягигача профессионал ва содда ҳуқуқ-тартибот ходими ўртасидаги қарама-қаршилик кўплаб кулгили вазиятларни келтириб чиқаради. “Шон исмли зомби”, “Скотт Пилигрим ҳаммага қарши” ва “Ҳайдовчи болакай” фильмларининг режиссёри Эдгар Райт томонидан кулгили кайфиятни кафолатлайдиган фильм.
“Ота-она билан танишув”
Инсоннинг турмуш ўртоғининг ота-онаси билан танишуви баъзан кўнгилдагидек кечмаслиги мумкин.
“Ота-она билан танишув” фильмида Бен Стиллер кам учрайдиган Факер фамилияли тиббий ходим Грег образини гавдалантирган. Грег севган қизи Пемнинг (Тери Поло) қўлини сўрашга қарор қилади. Иш фақатгина унинг қўлини отаси Жек Бёрнсдан (Роберт Де Ниро) сўрашда қолган. Фақат Грегни ҳеч ким жаноб Бёрнс — нафақадаги хавфсизлик ходими экани ҳақида огоҳлантирмаган. У Грег Факерни махсус хизматларнинг барча кўрсатмаларига мувофиқ текширмай туриб қизи билан турмуш қуришига рухсат бермайди. Грег эса Пемга лойиқ эканини исботлаш учун ҳамма нарсани қилади. Фақатгина кўпинча қизнинг отасига ёқишга бўлган уринишлари тескари натижага олиб келади.
Бу ғоят кулгили комедиянинг бир қисмдан иборат эмаслиги катта омад. Давоми — “Факерлар билан танишув” ҳам кулгили чиқди. Бу ерда ниҳоят Грегнинг ота-онаси — жаноб ва хоним Факер (Дастин Ҳоффман ва Барбра Стрейзанд) пайдо бўлади.
“Уолтер Миттининг ақл бовар қилмас ҳаёти”
Уолтер Митти (Бен Стиллер) Life журналининг иллюстрация бўлимида ишлайди. У кўп йиллар давомида машҳур нашриётда ишлайди, лекин ҳеч қачон диққат марказида бўлмаган. Унинг иши оддий ва бу уни қониқтиради. Уолтер ажойиб қобилиятга эга, у ўз хаёлида ҳар кимдан кўра узоқроқ саёҳат қилиши мумкин.
Бир куни унинг иши ҳақиқий тартибсизликка айланади. Фотограф Шон O‘Коннел (Шон Пенн) журнал муқоваси учун битта сурат юбормаган. Бу суратсиз журналнинг охирги чоп этилган сони чиқмайди. Уолтер Шон ва қимматли негативни қидириш учун саёҳатга чиқади. Ҳаётида биринчи марта у нафақат хаёлида, балки ҳақиқатда ҳам ажойиб саргузаштларни бошдан кечиради.
“Уолтер Миттининг ақл бовар қилмас ҳаёти” — фантастика ва мелодраматик элементларга эга комедия. Айтганча, Бен Стиллер нафақат бош ролни ўйнаган, балки фильмнинг режиссёри ҳам бўлган. Операторлик иши, ҳазил, актёрлик ўйини — бу фильмдаги ҳамма нарса юқори даражада. Энг муҳими, сиз нафақат мазза қилиб кулишингиз ва енгиллик ҳис қилишингиз, балки яна орзу қилишни, хаёл қилишни бошлашингиз мумкин.
“Қонундаги малласоч”
Қайта-қайта томоша қилишга арзийдиган фильм. Эл Вудс (Риз Уизерспун) — барча мумкин бўлган стереотип тасаввурларни ўзида мужассам этган табиий малласоч. Гўзал, мода ихлосманди, бой ота-онанинг қизи — бу рўйхатни чексиз давом эттириш мумкин. Унинг оптимизмсиз бўлишини тасаввур қилиш қийин, чунки у орзу қилиш мумкин бўлган ҳамма нарсага эга. Ҳатто келажакдаги куёвига, Уоррен (Метю Дэвис)га ҳам. Ҳар ҳолда, у чин дилдан шундай деб ўйларди.
Эл Уоррендан турмуш қуриш таклифини кутган куни, йигит тўсатдан қизни ташлаб кетади ва қиз унинг учун етарлича ақлли эмаслигини айтади. Уоррен Гарварднинг “Юридик” факультетига ўқишга киради ва билимдонроқ қизни қидиради. Уларнинг ҳикоясига нуқта қўйилгандек туюлади. Бироқ Эл Вудс таслим бўлишни ўйламайди.
Севгилисидан кейин у ажойиб тарзда Гарвардга, худди шу факультетга ўқишга киради. У дунёнинг энг нуфузли университетларидан бирида бўлиб, пушти либосда чихуа-хуа билан Эл Вудс нафақат Уоррен учун, балки бу нуфузли жойда ўқишга лойиқ эканини исботлашга ҳаракат қилади.
Агар қайсидир мақсадга эришиб бўлмайди, деб ўйласангиз, зудлик билан “Қонундаги малласоч”ни кўринг.
Риз Уизерспун сизга исталган нарсага эришиш мумкинлигини ва шу билан бирга ўзлигингизни сақлаб қолиш мумкинлигини эслатади.
“Паддингтоннинг саргузаштлари”
Ва ниҳоят, сўнгги йиллардаги энг кулгили ва илиқ фильмлардан бири — “Паддингтоннинг саргузаштлар”и. Фильм сюжетига кўра, туғилган ери Перуда юз берган зилзиладан сўнг ғайриоддий айиқча (Бен Уишоу) Лондонга йўл олади.
“Илтимос, бу айиқчага ғамхўрлик қилинг” ёзуви ва чемоданида бир банка мармелад билан у Паддингтон вокзалига етиб келади ва шу ерда Браунлар оиласи уни кўриб қолади. Улар жониворни ўзларининг уйига олиб кетишади, лекин ҳаммаси осон кечмайди. Айиқчанинг ортидан қонхўр таксидермист аёл (Никол Кидман) таъқиб қилади.
Одамлар орасидаги ҳаётга кўникиб борар экан, Паддингтон ўзи ҳам доимо тартибсизликлар уюштиради ва воқеаларга аралашади. Аммо шунга қарамай, у нафақат Браунларнинг, балки шаҳар аҳолисининг ҳамда улар билан бирга томошабинларнинг севгисини қозонади.
Бу ёқимли айиқча ҳақидаги ҳикоя шу билан тугамайди. Иккинчи қисмда Паддингтоннинг сарзгузаштлари шу қадар қизғин тус олдики, у ҳатто қамоққа ҳам тушиб қолди. Унинг панжара ортида бўлишининг ҳар бир сонияси томошабиннинг юзида кулги уйғотади.
Хю Грант ёвуз ролини ўйнаган “Паддингтоннинг саргузаштлари 2” фильми биринчи фильмдан ҳам кулгилироқ чиққан. Яқинда комедиянинг учинчи қисми ҳам чиқди, лекин биз сизга Паддингтон билан танишишни дастлабки қисмдан бошлашни тавсия қиламиз.
Изоҳ (0)