Оила даврасида томоша қилишингиз мумкин бўлган муҳаббат ва оилавий қадриятлар ҳақидаги турк сериаллари  

Турк сериаллари севги ва оила муносабатларига ўзига хос қарашни тақдим этади, бунда шарқ анъаналари замонавий ҳаёт билан уйғунлашиб кетади. Мазкур фильмларда ҳар бир саҳна самимийлик, меҳр ва инсоний туйғулар ҳақида ҳикоя қилади.

“Истанбуллик келин”

Бу сериални бемалол оилавий ҳаёт бўйича қўлланма дейиш мумкин. Уни бежиз уч йил давомида суратга олишмаган. Ҳар бир қисмда ҳаётий сабоқ ва актёрларнинг ажойиб ижроси мужассам.

Бош қаҳрамон Фарук — Бурсадаги бой ва нуфузли оиланинг вориси. Сурея эса, аксинча, Истанбулда холаси билан яшайдиган оддий, камтар қиз. Фарук ва Сурея бир-бирларига кўнгил қўйишади ва оила қуришади. Фарук ёш хотинини Бурсадаги ота-онаси уйига олиб келади. Ҳамма нарсани назорат қиладиган онаси ўғлининг қароридан норози бўлади. Суреянинг қайнонасига ёқиш учун қилган барча уринишлари зое кетади.

“Бизнинг ҳикоямиз”

2017 йилда “Бизнинг ҳикоямиз” сериали эфирга узатилди. Ушбу телелойиҳада комедия ва драма ажойиб тарзда уйғунлашган. Бу гал эътибор марказида мукаммал бўлмаган оила туради. Спиртли ичимликларга мубтало бўлган камбағал отанинг уйида олтита фарзанди бор, аммо у ўзини қўлга олиб, тарбия билан шуғулланиш ўрнига барчасини катта фарзандларига юклаб қўяди. Барча актёрлар ўз ролларини аъло даражада ижро этишган. “Бизнинг ҳикоямиз” юқори рейтингларга эга эди, бироқ Ҳазал Кайининг ҳомиладорлиги туфайли суратга олиш ишлари тўхтатилди.

“Ота”

Сюжет марказида Измирдаги кичик шаҳарчадан келган камтар оила бошлиғининг кутилмаганда Туркиянинг йирик холдингларидан бирига эга бўлиши тарихи ётади. Ўзининг қатъий қоидалари асосида яшашга ўрганган қаттиққўл Эмин Саруханли акаси Меҳмет Али самолёт ҳалокатида вафот этгач, кутилмаган меросга эга бўлади.

Истанбулга кўчиб ўтиш оила учун ҳақиқий синовга айланади: кутилмаган бойлик ва ҳокимият одатий турмуш тарзларини ўзгартира бошлайди. Оиладаги муносабатлар, айниқса, Эминнинг ўғли Қодир қамоқдан қайтгач, жиддий синовдан ўтади. Қодир отаси билан келишмовчилигини очиқ-ойдин намойиш этади.

“Оила”

Воқеалар марказида Истанбулдаги кучли жиноий гуруҳ раҳбари Аслан Сойкан билан истеъдодли руҳшунос Девин ўртасидаги чигал севги тарихи ётади. Аслан оиласида унинг онаси Ҳуля қаттиққўллик билан ҳукмронлик қилади. У тарқоқ оилани қатъий анъаналар ёрдамида бирлаштира олган, уларнинг энг муҳими — бир дастурхон атрофида кечки овқат ейиш.

Аслан оилавий кечки овқатнинг муқаддас қоидасини бузиб, нотаниш гўзал аёл — Девин ортидан югурганида ҳаммаси ўзгаради. Уларнинг учрашуви эҳтиросли муносабатга айланади, аммо руҳшуноснинг профессионал нигоҳи севгилисининг оиласидаги чуқур муаммоларни пайқамасдан қолмайди.

“Бебаҳо вақт”

Сериал 15 йил аввал суратга олинган бўлса-да, ҳанузгача долзарб. “Бебаҳо вақт” қизиқарли сценарий ва актёрлар таркибининг ажойиб уйғунлигидир. Ҳар бир қисм юракка тўғридан тўғри таъсир қиладиган кичик бир дурдона. Эҳтимол, аёл режиссёр бошқаргани учун ҳам сериал шунчалик таъсирли чиққандир.

“Бебаҳо вақт” бу — оила, муносабатлар ва инсон қўллаб-қувватлаш ҳамда севги бор жойда ҳар қандай қийинчиликларни енгиб ўтиш кучи ҳақидаги сериал. 

“Ҳаёт қўшиғи”

Сериалда оила, ҳаёт йўли, тақдир ва инсоний хатти-ҳаракатлар ҳақида ҳикоя қилинади.

Воқеалар марказида Ҳуля исмли қиз туради. Биз уни болалигидан бошлаб кузатамиз, аммо охиригача унинг ички дунёсини тўлиқ англаб етмаймиз. У жасур ва қувноқ қиз бўлиб, уни камтар деб аташ қийин. Керим билан учрашгандан сўнг, унга кўнгил қўяди.

Йиллар ўтиб, шўх қизалоқ вояга етган, ҳар доим мақсадларига эришадиган Ҳуляга айланади. У болаликдаги севгисини унутмаган. Икки бош қаҳрамоннинг тўйи билан воқеа тугамайди. Аксинча, сюжет янада чигаллашиб, қизиқарли тус олади.