Янги рекорд: бир суткадан ичида коинотга 6 хил ракета учирилди

Дунёнинг турли космодромларидан 29-30 апрель кунлари оралиғида атиги 17,5 соат ичида олтита орбитал учириш амалга оширилди. Ушбу кўрсаткич кунлик ракета учиришлар сони бўйича максимал натижадан икки баравар юқори. Бу ҳақда Space.cоm хабар бермоқда.

Учирилган ракеталар миссияларининг аксарияти сунъий йўлдош интернет тармоқларини жойлаштириш билан боғлиқ. 

Хусусан, 29 апрель куни Хитой Хайнан оролида жойлашган Венчан космодромидан Long March 5B ракетасини учирди. Ракета Гуованг кенг полосали алоқанинг катта сунъий йўлдош тармоғини яратиш учун мўлжалланган сунъий йўлдошлар гуруҳини паст Ер орбитасига олиб чиқди.

32 дақиқадан сўнг Калифорниядаги Ванденберг космик кучлари базасидан SpaceX Falcon 9 ракетаси учирилди. У 27 та Starlink интернет сунъий йўлдошини паст Ер орбитасига етказди.

Кейин, Шарқий вақт билан соат 19:01 да United Launch Alliance компаниясининг Atlas V ракета ташувчиси Флорида штатидаги Канаверал бурнидаги космик кучлар базасидан Амазон компаниясининг Project Kuiper кенг полосали алоқа мега юлдузи учун дастлабки 27 та сунъий йўлдошни орбитага олиб чиқди. 3,5 соатдан сўнг NASA’нинг Кеннеди космик марказидан яна бир Falcon 9 ракетаси учирилиб, орбитага 23 та Starlink сунъий йўлдоши етказилди.

30 апрель, чоршанба куни эрталаб яна иккита учириш амалга оширилди. Уларнинг ҳеч бири орбитага интернет сунъий йўлдошларини олиб чиқмади.

Франция Гвианасидаги Куру космодромидан шарқий вақт билан соат 5:15 да Арианеспаcе компаниясининг Vega-C ракетаси учирилди. У Европа космик агентлигининг Биомасс сунъий йўлдошини паст Ер орбитасига олиб чиқди. Ушбу аппарат ўрмонларнинг ҳолатини кузатиб боради. Vega-C учун бу атиги тўртинчи ва 2022 йил декабрь ойидаги муваффақиятсиз парвоздан кейинги иккинчи учириш эди.

Шу куни эрталаб Firefly Aerospace компанияси Ванденберг космодромидан Алпҳа ракетасини олтинчи марта учирди. Ракета Lockheed Martin технологияларининг намойиши сунъий йўлдошини олиб борган. Бироқ биринчи ва иккинчи босқичларни ажратиш пайтида носозлик юз берди ва фойдали юк йўқолган.

“Жами 17,5 соат ичида олтита орбитал учириш амалга оширилди, улардан бештаси муваффақиятли якунланди. Бу ғоят юқори фаоллик ва эҳтимол, бу ҳали бошланиши. SpaceX аллақачон ҳафтасига бир нечта учиришни амалга оширмоқда ва кенг полосали алоқа учун бир нечта йирик сунъий йўлдош тармоқларини ишлаб чиқиш давом этмоқда. Шунинг учун ракеталарнинг учирилиши янада тез-тез содир бўлишини кутиш мумкин”, дея ёзмоқда нашр.