Италиялик мусиқачи, киноактёр, эстрада хонандаси, бастакор, жамоат арбоби, 87 ёшли Адриано Челентано ҳозирда катта экран, саҳна ва камералардан узоқ жойда яшайди. Аммо папарацилар афсонавий актёрни кўриб қолиб, уни суратга олишга муваффақ бўлди.
Италиянинг Примо Асcолто нашри Адриано Челентанонинг янги суратини ўзининг ижтимоий тармоқдаги саҳифасида намойиш қилди. Актёр машинасида ўтирган ҳолда камерага тушган: Адриано суратга тушаётган вақтда журналистга табассум қилди ва объективга қўл силкиб қўйди.
Интернет фойдаланувчилари актёрнинг ташқи кўринишидан ҳайратда қолишди: “Кексайган бўлса-да, деярли ўзгармаган”, “Қандай кўркам инсон”, “Унинг табассумини кўриб, хурсанд бўлдик”, “Афсонавий актёр” каби изоҳлар қолдирди.
Челентано узоқ йиллардан бери Комо кўли яқинидаги курорт ҳудудида жойлашган ҳашаматли уйида яшайди. У актёрлик фаолиятини тугатиш қарорини 1994 йилда қабул қилган. Сўнгги марта у экранларда 1992 йилда — “Жекпот” фильмида чиққан.
Маълумот учун, Адриано Челентано 1938 йил 6 январда Италияда, Милан шаҳрида туғилган. У бутун дунё бўйлаб таниқли бўлиб, ўзининг кўплаб фильмлари ва мусиқий ижоди билан машҳур. Челентано 1960 йилларда италян кино ва мусиқасининг йирик юлдузларидан бирига айланган.
Илк актёрлик фаолиятини 1959 йилда бошлаган ва тезда Италия ва бутун дунёда юлдузга айланган. Унинг энг машҳур фильмлари орасида “Қайсарнинг қуйилиши” (1979), “Ширин ҳаёт” (1960), “Серафино” (1968), “Юппи Ду” (1975) ва “Жекпот” (1992) каби комедия ва драма жанридаги фильмлар мавжуд.
Изоҳ (0)