Qoraqalpog‘iston Respublikasining To‘rtko‘l tumanida o‘tkazilgan tezkor tadbir davomida opiy giyohvandlik vositasi aniqlandi. Bu haqda Xorazm viloyati bojxona boshqarmasi xabar berdi.
Maʼlum qilinishicha, Isuzu avtotransport vositasida yo‘lovchi sifatida harakatlanayotgan fuqaroning sumkasi belgilangan tartibda ko‘zdan kechirilgan. Unda silindrsimon shakldagi sellofan paketlarga o‘ralgan, sof og‘irligi 217,15 gramm bo‘lgan opiy giyohvandlik vositasi borligi ma’lum bo‘ldi.
Shuningdek, fuqaroning o‘zi kiyib olgan ichki kiyimi ichida ham yana 1 o‘ramda, sof og‘irligi 37,52 gramm bo‘lgan opiy moddasi borligi aniqlandi.
Tadbir davomida jami sof og‘irligi 254,67 gramm bo‘lgan giyohvandlik vositasining noqonuniy muomalasiga chek qo‘yilgan.
Hozirda holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)